मंसिर ४ मा हुने प्रदेशसभा र प्रतिनिधिसभा चुनाव नजिकिँदै गर्दा चुनावमा उम्मेदवार बन्न चाहने नयाँ अनुहारहरू सार्वजनिक भइरहेका छन् ।

मुख्यगरी स्थापित दलका शीर्ष नेतालाई विस्थापित गर्ने भन्दै कतिपयले उम्मेदवारी घोषणा गरेका छन् । 

उनीहरू स्वतन्त्र उम्मेदवारकारूपमा चुनावी मैदानमा होमिने तयारी गरिरहेका छन् । स्वतन्त्र उम्मेदवार अभियानमा रहेका कतिपयले भने ‘पूर्व प्रधानमन्त्री हराऊ’ अभियान नै चलाइरहेका छन् । 

मुख्य राजनीतिक दलका शीर्ष नेताहरूबाट देशले विकास र समृद्धि हासिल गर्न नसक्ने भएकाले उनीहरूलाई आगामी चुनावमै राजनीतिबाट विस्थापित गर्नुपर्ने तर्क स्वतन्त्र युवा उम्मेदवारहरूले गरिरहेका छन् । 

तिनै तर्क र उद्देश्यबाट प्रभावित भएर कतिपयले स्थापित मुख्य दलका शीर्ष नेताहरूकाविरूद्ध उम्मेदवारी दिने घोषणा गरिरहेका छन् ।

नेकपा एमालेका अध्यक्ष एवं पूर्व प्रधानमन्त्री केपी शर्मा ओलीलाई आगामी चुनावमा चुनौती दिने भनेर लेखक तथा विश्लेषक दीपक (युग) पाठकले उम्मेदवार घोषणा गरेका छन् ।

केपी ओलीले चुनाव जित्दै आएको झापाको प्रतिनिधिसभा निर्वाचन क्षेत्र नम्बर ५ बाट उम्मेदवार बन्ने घोषणा पाठकले गरेका छन् ।

बाल्यकाल झापामा बिताएका पाठकले केही समय हेटौंडामा बिताए । पछिल्लो समय उनी काठमाडौंमा बस्दै आएका छन् । 

केपी ओली प्रधानमन्त्री रहँदा गरेको संसद् विघटनविरुद्ध पाठक बृहत् नागरिक आन्दोलनमा सहभागी भएका थिए । त्यसबाहेक उनी विभिन्न समयमा राजनीतिक अभियानहरूमा पनि सहभागी हुने गरेका छन् । 

केपी ओलीकै कारण अहिले राजनीति दक्षिणपन्थी धारमा पुगेको दाबी गर्ने पाठकले उनलाई चुनावबाट हराउन सके मात्रै ओलीले गरेका गलत कामको सजाय पाउने बताउने गरेका छन् ।

त्यसका लागि आफूले उम्मेदवारी घोषणा गरेको उनको भनाइ छ ।

२०७४ को चुनावमा एमाले अध्यक्ष केपी शर्मा ओलीले झापा– ५ मा राष्ट्रिय प्रजातन्त्र पार्टीसँग पनि सहकार्य गरेका थिए ।

एमाले र माओवादी केन्द्रको गठबन्धन बनेका बेला राप्रपाको समेत मत लिएर ओलीले चुनाव जितेका थिए । यसपटक पनि ओलीले राप्रपासँग चुनावी सहकार्यका लागि छलफल गरिरहेका छन् । 

ओलीलाई नै चुनौती दिन भन्दै अखिल क्रान्तिकारीका पूर्व अध्यक्ष एवं माओवादी केन्द्रीय सदस्य रञ्जित तामाङ पनि अगाडि सरेका छन् । उनी सत्ता गठबन्धनबाट उम्मेदवार बन्ने प्रयासमा छन् ।

प्रधानमन्त्री समेत रहेका कांग्रेस सभापति शेरबहादुर देउवालाई पराजित गर्नका लागि डडेल्धुराबाट चुनाव लड्ने भनेर गुल्मीका युवा सागर ढकालले उम्मेदवार घोषणा गरेका छन् ।

आगामी चुनावपछि बन्ने सरकारमा ४० वर्षभन्दा कम उमेरको प्रधानमन्त्री देशले पाउने घोषणा गरेर ढकाल चुनाव प्रचारका लागि डडेल्धुरामा खटिइरहेका छन् । उनले राजनीतिबाट हजुरबुवा पुस्तालाई आराम दिनुपर्ने अभियान समेत चलाइरहेका छन् ।

केही वर्षअघि बीबीसीको साझा सबाल कार्यक्रममा तत्कालीन प्रधानमन्त्री देउवालाई चिढ्याउने गरी प्रश्न सोधेपछि उनी चर्चामा आएका थिए ।

अक्सफोर्ड विश्वविद्यालयमा इन्जिनीयरिङ अध्ययन गरेका उनी प्रधानमन्त्री देउवालाई पराजित गरेर सक्रिय राजनीतिमा आउने भनेर चुनावी प्रचार गरिरहेका हुन् ।

अर्का पूर्व प्रधानमन्त्री एवं नेकपा एकीकृत समाजवादीका अध्यक्ष रहेका माधव नेपालकाविरूद्ध अनुप बोहोराले उम्मेदवारी घोषणा गरेका छन् ।

माधव नेपालले काठमाडौंको क्षेत्र नम्बर २ बाट उम्मेदवारी दिएको अवस्थामा उनीविरूद्ध चुनावी प्रतिस्पर्धा गर्ने घोषणा बोहोराले गरेका हुन् ।

तर, यसपटक माधव नेपाल रौतहट– १ बाट उम्मेदवार बन्ने एकीकृत समाजवादीभित्र चर्चा छ ।

बोहोराले रवि लामिछाने नेतृत्वको राष्ट्रिय स्वतन्त्र पार्टीको तर्फबाट उम्मेदवारी घोषणा गरेका हुन् । बिजनेस एडमिनिस्ट्रेशन अध्ययन गरेका बोहोरा व्यवसायी हुन् । 

नेकपा एमालेका वरिष्ठ उपाध्यक्ष एवं पूर्व उपप्रधानमन्त्री ईश्वर पोखरेललाई सबैभन्दा धेरै स्वतन्त्र उम्मेदवारहरूले चुनावी मैदानमा चुनौती दिने घोषणा गरेका छन् । पोखरेलले काठमाडौं– ५ बाट चुनाव जितेका थिए । यसपटक उनलाई चुनौती दिन करीब आधा दर्जन स्वतन्त्र उम्मेदवार तयार भएका छन् । 

पहिले विवेकशील र पछि विवेकशील साझा पार्टीमा आबद्ध भएर राजनीतिमा आएकी रञ्जु दर्शनाले काठमाडौं– ५ बाट उम्मेदवारी दिने घोषणा गरेकी छिन् । 

कलाकारिता पृष्ठभूमिबाट ख्याती कमाएका मधुसुधन पाठक ‘सीते बा’ पनि स्वतन्त्र अभियानमार्फत चुनावी मैदानमा होमिएका छन् ।

उनले काठमाडौंको क्षेत्र नम्बर ५ बाटै चुनाव जितेर सक्रिय राजनीतिमा आउने बताइसकेका छन् ।

त्यसैगरी युवा उद्यमी विजय कंडेलले पनि काठमाडौं क्षेत्र नम्बर ५ बाट स्वतन्त्र उम्मेदवारी घोषणा गरेका छन् । उनी विभिन्न सामाजिक गतिविधि र व्यापारमा संलग्न छन् । 

कंडेलले हाइजेनिक मिट सेन्टर, समाधान सेवा नेपाल, एचएम्सी फुड्स, हाइजेनिक एग्रो टुरिजम फार्मलगायत व्यवसाय सञ्चालन गर्दै आएका छन् ।

यसअघि उनले काठमाडौंलाई धूलोरहित बनाउन ‘जाग्यो नेपाल’ अभियान चलाएका थिए ।

नेपाली कांग्रेसका महामन्त्री रहेका प्रभावशाली युवा नेता गगन थापाले चुनाव जित्दै आएको काठमाडौंको क्षेत्र नम्बर ४ मा इन्जिनीयर आकर्षण पोखरेलले थापालाई चुनौती दिने घोषणा गरेका छन् । 

गत असारको पहिलो साता कपनमा एक कार्यक्रम गरेर स्वतन्त्र उम्मेदवारी घोषणा गरेका पोखरेलले गणितीय हिसाबले चुनावमा हार र जीत देखिए पनि राजनीतिमा कहिल्यै नहार्ने दाबी गरेका थिए ।

उम्मेदवारी घोषणा गर्दै पोखरेलले भनेका थिए, ‘मैले पाँचवटा कुरालाई आफ्नो आधार मानेर अगाडि बढ्ने प्रण गरेको छु,’ उनले भने, ‘मैले मात्र होइन जुनसुकै उम्मेदवारले पनि योजना, योग्यता, क्षमता, विशेषज्ञता र विवेक, यी पाँच चिजको प्रयोग गर्ने हो भने आज जति पनि समस्या तपाईंहामीले भोगिरहेका छौं, यी समस्या भोग्न पर्दैन ।’

उक्त निर्वाचन क्षेत्रमा रहेका शिक्षा, स्वास्थ्य, खानेपानी, सडक/ट्राफिक व्यवस्थापन, ढल तथा डुबान, पुल तथा खोला/खहरे व्यवस्थापन लगायतका समस्या समाधानको मार्गचित्र बनाएर समाधान खोज्ने बताएका छन् ।

२०७४ को चुनावमा काठमाडौं– ४ बाट थापाले एमालेका उम्मेदवार डा. राजन भट्टराईलाई पराजित गरेका थिए । आगामी चुनावमा पनि एमालेले थापाका विरूद्ध भट्टराईलाई नै अघि सार्ने तयारी गरेको छ ।

सोही क्षेत्रमा 'शेयर सुन्दरी'को उपमा पाएकी राधा पोखरेल पनि उम्मेदवार बन्ने चर्चा छ ।

काठमाडौंको क्षेत्र नम्बर– १ बाट नेपाली कांग्रेसका नेता प्रकाशमान सिंहले चुनाव जित्दै आएका छन् । 

२०७४ को चुनावमा सिंहले विवेकशील साझाका तत्कालीन संयोजक रवीन्द्र मिश्रलाई झिनो मतान्तरले पराजित गरेका थिए । 

यसपटक भने सिंहलाई स्वतन्त्र उम्मेदवारहरूले पनि चुनौती दिने घोषणा गरेका छन् । रवीन्द्र मिश्र आफैं पनि फेरि काठमाडौं– १ बाटै चुनाव लड्ने तयारीमा छन् । 

त्यसबाहेक, सामाजिक अभियन्ता पुकार बमले काठमाडौं क्षेत्र नम्बर–१ बाट आगामी चुनावमा उम्मेदवार बन्ने घोषणा गरेका छन् । सामाजिक, राजनीतिक अभियन्ता रहेका बम भूकम्प, कोरोना महामारी, संविधान र अकुपाई बालुवाटार जस्ता अभियानबाट चर्चित बनेका थिए । 

उनले भूकम्पका बेला राहत संकलन र वितरण गरेर चर्चा कमाएका थिए । कोरोना महामारीका बेला खाना खुवाउने, अक्सिजन जुटाउने, बिरामीको उद्धार गर्ने लगायतका कामले उनलाई चर्चित बनाएको थियो । उनले यही सामाजिक पूँजीलाई आधार बनाएर चुनाव लड्ने घोषणा गरेका छन् ।

राजनीतिमा हालिमुहाली गरिरहेका शीर्ष नेतृत्वलाई चुनौती चुनावी मैदानमा खडा हुनु ठूलो कुरा भएन । तर, जनमत आफ्नो पक्षमा पारेर राजनीतिका 'हेभीवेट'लाई पराजित गर्न सक्दा मात्रै उम्मेदवारीको सार्थकता रहन्छ ।

ठूला नेताहरूलाई चुनौती दिएर उम्मेदवार बनेका नयाँ अनुहारले 'हेभीवेट'लाई स्तब्ध बनाउन त्यति सजिलो भने देखिँदैन । 

पढ्नुहोस्, यो पनि :

 

भावी प्रधानमन्त्रीका दाबेदार ८ ‘हेभी वेट’ नेता, को कति सुरक्षित ?