नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले निजी क्षेत्रद्वारा प्रबर्द्धित ठूला पूर्वाधार परियोजनामा लगानी बढाउन एशियाली विकास बैंक (एडीबी)लाई आग्रह गरेका छन् । शुक्रवार राजधानीमा एडीबीका उपाध्यक्ष अशोक लाभासासँगको भेटमा ढकालले त्यस्तो आग्रह गरेका हुन् । 

ग्लोबल आइएमई बैंकका अध्यक्षसमेत रहेका ढकालले निजी क्षेत्रले प्रबद्र्धन गरिरहेको पूर्वाधार विकासका ठूला–ठूला परियोजनामा एशियाली विकास बैंकलाई लगानीका लागि आग्रह गरे । ‘मुलुकको विकासमा पूर्वाधारको महत्वपूर्ण भूमिका रहन्छ । यहाँहरुले यस्ता पूर्वाधारको क्षेत्रमा लगानी बढाउँदा पूर्वाधारको विकासमा सहयोग पुग्नुका साथै मुलुकको समग्र विकासमा समेत ठूलो योगदान पुग्नसक्छ’, उनले भने, ‘निजी क्षेत्रद्वारा प्रबर्द्धित ठूलाठूला पूर्वाधारका परियोजनामा लगानीको प्रसस्त सम्भावनाहरू छन् । स्रोतको अभावमा नेपालको निजी क्षेत्रले ठूलाठूला पर्यटन, जलविद्युत, सडक, होटललगायतका पूर्वाधारमा लगानी गर्न सकेको छैन । यस क्षेत्रमा एशियाली विकास बैंकले लगानी विस्तार गर्नुपर्‍यो ।’

ढकालले नेपालको बैंकिङ क्षेत्र लगानीयोग्य पुँजीको अभावबाट गुज्रिरहेको बताउँदै यसको समाधानका लागि पनि एडीबीको सहयोग आवश्यक रहेको बताए । 

त्यस अवसरमा एडीबीका उपाध्यक्ष लाभासले बैंक यसमा सकारात्मक रहेको बताउँदै नेपालको निजी क्षेत्रसँग सहकार्य गरी सम्भावना रहेका पूर्वाधारका परियोजनामा लगानीका लागि तयार रहेको बताए । 

भेटमा ग्लोबल आइएमई बैंकका प्रमुख कार्यकारी अधिकृत रत्नराज बज्राचार्य तथा एडीबीका प्रतिनिधिहरूको समेत उपस्थिति रहेको थियो ।