नेकपा एमालेका अध्यक्ष केपी शर्मा ओलीले आगामी निर्वाचन स्वतन्त्र, निष्पक्ष र धाँधलीरहित हुनुपर्ने बताएका छन् । निर्वाचन गराउन निर्वाचन आयोगले पनि सोही अनुसारको भूमिका निर्वाह गर्नुपर्ने उनले बताए ।

प्रतिनिधि सभाको यस कार्यकालको अन्तिम बैठकलाई शनिवार सम्बोधन गर्दै ओलीले निर्वाचन आयोग सरकारबाट लतारिएर जान नहुने बताए । 

उनले भने, ‘निर्वाचन शान्तिपूर्ण, निर्भय, निष्पक्ष, स्वतन्त्र र धाँधलीरहित ढंगले सम्पन्न गरिनुपर्छ । यो निर्वाचन आयोगको कर्तव्य हो । निर्वाचन आयोगलाई म आग्रह गर्न चाहन्छु– निर्वाचन आयोग सत्तापक्षबाट लतारिएर नचलोस्, आफ्नो स्वतन्त्र हैसियत र स्वतन्त्र भूमिकालाई प्रभावकारी ढंगले अगाडि बढाओस् ।’

आफ्नो भूमिका सरकारलाई सचेत गराउने भएको र आफूले सचेत गराएको उनले बताए । ‘सरकारलाई म भन्न चाहन्छु । अब उपरान्त निर्वाचन सञ्चालन गर्ने काम निर्वाचन आयोगले गर्ने हो । सरकारले निर्वाचन सम्पन्न गर्न सहयोग गर्ने हो । सरकारको हस्तक्षेपकारी भूमिकाले निर्वाचनलाई अस्वस्थ ढंगले प्रभावित गर्न पाउँदैन ।’

स्थानीय तह निर्वाचनमा सरकारले शक्तिको दुरुपयोग भएको र आगामी चुनावका त्यस्तो नगर्न पनि उनले सरकारलाई सचेत गराएका छन् । 

‘गएको स्थानीय तह निर्वाचनमा सत्तापक्षीय भूमिका, सत्ताको दुरुपयोग, अनेक प्रकारले सत्ताको दुरुपयोगजस्ता कुराहरू नराम्ररी प्रकट भए, प्रहरी प्रशासन, राज्य संयन्त्रको विभिन्न ढंगले दुरुपयोग गर्ने काम भए’, उनले भने ।

‘लोकतान्त्रिक प्रणालीमा भिन्न मतको अस्तित्व स्वीकार्ने, भिन्न मतसँग प्रतिस्पर्धा गर्न तयार हुने र प्रतिस्पर्धा गर्न दिने व्यवस्था हो । निर्वाचनमा निर्वाचन आयोग सत्ता पक्षबाट लतारिएर नचलोस्’, ओलीले भने ।