लोकतान्त्रिक समाजवादी पार्टीका वरिष्ठ नेता राजेन्द्र महतोले यो शासनसत्ता र संविधानबाट जनता सन्तुष्ट नभएको बताएका छन् । 

प्रतिनिधि सभामा शनिवार सम्बोधन गर्दै महतोले जनतालाई गोली ठोकी–ठोकी बनाएको संविधानको परिणाम अहिले देखिएको बताए । सबै नेपाली जनताको लागि संविधान नबनेको उनको भनाइ थियो । मधेशी, आदिवासी जनजाति, मुस्लिमलगायतको लागि संविधान संविधानसभाबाट नबनेको उनले बताए ।

‘१६ बुँदे सहमतिबाट षड्यन्त्र गरी बनाइएको संविधान औपनिवेशिक चिन्तन सोचबाट शासन चलाउने उद्देश्यले बनेको हो’, उनले भने, ‘देशका जनतालाई गुलाम बनाएर मधेशी, थारु, आदिवासी जनजाति, मुस्लिम आदिमाथि शासन गर्ने उद्देश्यले संविधान बनाइएको हो ।’

एउटा मात्र जाति समुदायले संविधान र शासन सत्तामा आत्म गौरवको अनुभूति गर्ने तथा बाँकीले गौरवको अनुभूति नगरेको उनले बताए । 

जनताको अधिकार, पहिचानको सवाल अगाडि नबढेको, आर्थिक जीवन आदिमा केही पनि सुधार नभएको उनले बताएका छन् ।

‘धेरै राम्रो काम गरेको छु भनेर सत्ता गठबन्धनले आफ्नो पिठ्युँ आफ्नै हातले थपथपाएको जस्तो भएको छ, तर वास्तवमा जनता सन्तुष्ट भने छैनन’, महतोले भने ।