काठमाडौं महानगरपालिकाका प्रमुख बालेन्द्र साह (बालेन)ले जीवनमा जितमात्र नभई हार्न पनि सक्नुपर्ने बताएका छन् । हरेक हारबाट धेरै अनुभव लिन सकिने भन्दै उनले हारलाई स्वीकारेर अघि बढ्नु नै जीवन रहेको बताए । 

आइतवार काठमाडौंमा आयोजित आत्महत्या रोकथाम तथा न्यूनीकरणसम्बन्धी सचेतना कार्यक्रमलाई सम्बोधन गर्दै मेयर बालेनले भने, ‘हामीले जिन्दगीमा हार्न सिकेका हुँदैनौँ । हामी सोसल मिडियामा ब्यस्त हुन्छौँ । हामी हार्न निकै डराउँछौँ । हामी आफूलाई कमजोर छौँ भन्ने सोच्छौँ तर त्यसरी सोच्नु हुँदैन । कुनैपनि कुरा हार्न सिक्नुपर्छ । सबै ठाउँमा सफल भइन्छ भन्ने हुँदैन । हार्नुले हामीलाई धेरै सिकाउँछ ।’

काठमाडौं महानगरपालिकाकी उपप्रमुख सुनिता डंगोलले अहिले युवा पुस्ताले सबैभन्दा धेरै आत्महत्या गरिरहेको बताइन् । उनले सामाजिक सञ्जाललाई सही प्रयोग गर्न नसक्दा पनि कतिपय आत्महत्याका घटना हुने गरेको भन्दै यसतर्फ सबै सचेत हुन जरुरी रहेको बताइन् । 

उनले भनिन्, ‘आजभोलि सुसाइडहरू युवा पुस्तामा बढिरहेको तथ्यांकले देखाएको छ । सामाजिक सञ्जाल चलाउँदा जथाभावी गाली नगर्नुस् । सामाजिक सञ्जालमा आउने सबैकुरा सत्य हुँदैनन् ।’