नेकपा एकिकृत समाजवादी मकवानपुरकी जिल्ला सचिवालय सदस्य मनिला विष्टसहितका नेताहरूलाई पार्टी प्रवेश गराएकोमा असन्तुष्टि जनाउँदै नेकपा एमाले मकवानपुरका नेताहरूले पार्टी परित्याग गरेका छन् । जिल्ला नेतृत्वले आफूहरूसँग सल्लाह नगरी विष्टलगायतलाई पार्टी प्रवेश गराएको विरोधमा जिल्ला कमिटी सदस्यसहित ६५ जनाले पार्टी परित्याग गरेको घोषणा गरेका छन् ।

२०७४ मा एमालेबाट मकवानपुरको मनहरि गाउँपालिकाको उपाध्यक्ष पदमा निर्वाचित विष्ट एमाले विभाजनका बेला नेकपा एसमा लागेकी थिइन् । त्यस्तै गत वैशाख ३० मा भएको स्थानीय निर्वाचनमा उनी नेकपा एसबाटै उपाध्यक्ष पदमा उम्मेदवार बनेकी थिइन् । यद्यपि, उनी पराजित भइन् । त्यसलगत्ततै विष्ट गत सोमवार पुग्न एमालेमै फर्केकी थिइन् । 

विष्टको प्रवेशसँगै एमाले नेता कार्यकर्ताहरूले गत स्थानीय निर्वाचनमा गठबन्धनसँग मिलेर एमाले हराउन लागेको भन्दै चर्को आलोचना गरेका थिए । बुधवार त्यसकै विरोधमा एमाले मनहरि गाउँपालिका वडा नम्बर ५ मा रहेको कमिटीले एमाले परित्याग गरेको हो । 

पार्टी परित्याग गर्नेहरूमा जिल्ला सदस्य शुभराज थिङ, गाउँ कमिटी उपाध्यक्ष मोहनलाल थिङ, सचिवालय सदस्य पम्फा रोक्का, गाउँकमिटी सदस्य एवं ५ नम्बर सह–इन्चार्ज बुद्धिराम मोक्तान, वडा नम्बर ५ का वडाध्यक्ष सोमनाथ रुम्बा, उपाध्यक्ष बलराम बस्नेत, उपसचिव लीलाकुमारी आचार्यलगायतका रहेका छन् ।

पार्टी परित्यागबारे लोकान्तरसँग कुरा गर्दै एमाले मकवानपुरका जिल्ला सचिव नविन सिग्देलले अहिलेसम्म आधिकारिक रूपमा पार्टीलाई जानकारी नभएको बताए ।