काठमाडौंको कागेश्वरी मनोहरा नगरपालिका–८ गोठाटारस्थित एडभेञ्चर इन्टरप्राइजेज गार्मेन्टका सञ्चालक ५८ वर्षीय लाल मोहमद भन्ने मोहम्मद दर्जीमाथि गोली प्रहार गरी हत्या गरिएको घटनामा संलग्न ३ जनालाई प्रहरीले पक्राउ गरेको छ ।

असोज ३ गते मोटरसाइकलमा आएका व्यक्तिहरूको गोली प्रहारबाट दर्जीको निधन भएको थियो ।

सर्लाहीको सिसौरिया–६ स्थायी ठेगाना रहेका दर्जीलाई तत्कालै घाइते अवस्थाा उपचारको लागि शंखरापुर अस्पताल हुँदै त्रिवि शिक्षण अस्पताल महाराजगञ्ज काठमाडौंमा लगिएकोमा उपचारको क्रममा उनको मृत्यु भएको थियो ।

घटनामा संलग्न भएको आरोपमा प्रहरीले पर्साको वीरगञ्ज महानगरपालिका–१६ का २१ वर्षीय महोरम मियाँ, वीरगञ्ज–१५ का १९ वर्षीय रेहान मियाँ र मकवानपुरको बकैया गाउँपालिका–१ घर भई हाल काठमाडौंको कपनस्थित फैकाचोक बस्ने २१ वर्षीय सुमी भन्ने सुस्मिता स्याङताङलाई पक्राउ गरेको छ । महोरम र रेहान हत्याका योजनाकार रहेका र समीले मृतकको गतिविधिको निगरानी गरेको जनाइएको छ ।

आरोपीउपर ‘मुलुकी अपराध (संहिता) ऐन २०७४ को परिच्छेद–१२ को ज्यान सम्बन्धी कसूर’ मुद्दामा काठमाडौं जिल्ला अदालतबाट पक्राउ अनुमति प्राप्त भई जिल्ला प्रहरी परिसरबाट थप अनुसन्धान भइरहेको जनाइएको छ ।