नेकपा माओवादी केन्द्रका उपाध्यक्ष कृष्णबहादुर महराको नाम समानुपातिक सूचीबाट हटाइएको छ । 

यसअघि उनलाई माओवादी केन्द्रले समानुपातिक उम्मेदवारको पहिलो नम्बरमा राखेर बन्द सूची निर्वाचन आयोगमा पेश गरेको थियो । 

निर्वाचन आयोगले दिएको समयमा सूचि सच्च्याउँदा माओवादी केन्द्रले महराको नाम हटाएर बुझाएको हो । 

महराको नाम समानुपातिक उम्मेदवारको सूचीबाट हटाइएको माओवादी केन्द्रका कोषाध्यक्ष एवं कार्यालय सचिव श्रीराम ढकालले जानकारी दिए । 

‘उहाँ आफैले समानुपातिक उम्मेदवार बन्दिन, मेरो नाम हटाइदिनुहोस् भन्नुभयो । त्यसैले सूची सच्च्याउँदा उहाँ (महरा)को नाम हटाएका छौं’, ढकालले लोकान्तरसँग भने । 

माओवादी केन्द्रले महराको नाम पहिलो नम्बरमा राखेको थियो । उनको नाम हटेपछि हितराज पाण्डेको नाम पहिलो नम्बरमा राखेर माओवादी केन्द्रले समानुपातिक उम्मेदवारको अन्तिम सूची निर्वाचन आयोगमा बुझाएको छ ।

महराले यसअघि धेरैतिरबाट चुनाव लड्न माग भएकोले देशकै उम्मेदवार बन्ने भन्दै समानुपातिक उम्मेदवार बनेको बताएका थिए । आफ्नो रूचीले समानुपातिक रोजेको बताएका महराले अहिले नाम हटाउन लगाएका छन् । 

गोरखाका पाण्डे माओवादी केन्द्रका सचिव छन् । पाण्डे यसअघि २०७४ को चुनावपछि पनि माओवादी केन्द्रमा समानुपातिक तर्फका सांसद बनेका थिए । त्यसबेला माओवादी केन्द्रबाट एक मात्रै पुरूष समानुपातिक सांसद बन्दा पाण्डेले अवसर पाएका थिए ।