सत्तारुढ गठबन्धन र लोकतान्त्रिक समाजवादी पार्टी (लोसपा)बीच आगामी मंसिर ४ गते हुने प्रतिनिधि सभा तथा प्रदेश सभा निर्वाचनमा तालमेल गरेर जाने सैद्धान्तिक सहमति भएको छ । गठबन्धनबाट जनता समाजवादी पार्टी (जसपा) बाहिरिएपछि लोसपाले प्रवेश पाएकाे हाे । 

शुक्रवार प्रधानमन्त्रीको सरकारी निवास बालुवाटारमा भएको छलफलमा आगामी निर्वाचनमा गठबन्धन गरेर जाने सैद्धान्तिक सहमति भएको लोसपा नेता जितेन्द्र सोनलले लोकान्तरलाई जानकारी दिए । सिट बाँडफाँडका बारेमा पनि प्रारम्भिक छलफल भएको उनले बताए । 

नेता सोनलका अनुसार शुक्रवारको वार्ता सकारात्मक भएको छ । गठबन्धन र लोसपा नेताहरूबीच शनिवार पुनः छलफलमा बसेर सिट बाँडफाँटबारे अन्तिम निर्णय गर्ने सहमति भएको उनले बताए । ‘आजको छलफलमा गठबन्धन र लोसपाबीच गठबन्धन गरेर आगामी निर्वाचन जाने सैद्धान्तिक सहमति भएको छ, सिट बाँडफाँटबारे पनि केही कुरा भएको छ’, उनले भने, ‘भोलि बिहान फेरि बसेर यसलाई टुंग्याउने सहमति भएको छ ।’ 

गठबन्धन र लोसपाबीच शनिवार बिहान ८ बजे पुनः बालुवाटारमा छलफल हुने सोनलले जानकारी दिए । 

यसअघि गठबन्धनका रहेको जसपा बाहिरिएपछि लोसपाले प्रवेश पाएको हो । जसपाले एमालेसँग गठबन्धन गर्ने तयारी गरिरहेको छ ।