नेपालको हवाई उड्डयन क्षेत्र करिब १० वर्षदेखि युरोपेली युनियन (ईयू)को सुरक्षा सूची (कालोसूची)मा छ । सुरक्षा सूचीका कारण नेपालका वायुसेवा युरोपेली देशमा उड्न नपाउने र यूरोपेली वायुसेवा पनि नेपालमा नआउने भनिएपछि नेपाली उड्डयनमा नकारात्मक असर परिरहेको छ । 

अहिले नेपालमा युरोपमै बनेका हेलिकप्टर उडिरहेका छन् भने हवाई जहाजका पाटपूर्जादेखि सबै उड्डयनसम्बन्धी उपकरण युरोपबाटै आउँछ । नेपाललाई युरोपले नै जहाज बिक्री गर्ने, तर नेपाली वायुसेवालाई भने ईयूअन्तर्गतका मुलुकको उडानमा प्रतिबन्ध लगाउनु व्यवहारिक रूपमा पनि ठीक नभएको नेपाल नागरिक उड्डयन प्राधिकरणका महानिर्देशक ई. प्रदीप अधिकारीले बताए । अधिकारीका अनुसार सरकारले नीति, नियम सुधार गर्ने काम नगरेकाले नेपाली उड्डयन क्षेत्र १० वर्षदेखि कालोसूचीमा परेको हो । 

अधिकारीले भने ‘ईयूको कालोसूचीमा पर्नुलाई नागरिक उड्डयन प्राधिकरणलाई विभाजन नगर्नु भनेर नकारात्मक प्रचार भइरहेको छ । तर, त्यस्तो होइन । नेपालले पछिल्लो १० वर्षमा उड्डयन क्षेत्रमा निकै ठूलो सुधार गरेको छ ।’ अधिकारीका अनुसार अन्तर्राष्ट्रिय नागरिक उड्डयन संगठन (आइकाओ)ले तोकेको विश्वको औसत दरभन्दा माथि उड्डयन सुरक्षामा सुधार भइसकेको छ । तर, पनि ईयूले भने अहिलेसम्म नेपाली वायुसेवालाई कालोसूचीमा नै राखिरहेकाे छ ।

पछिल्लो समय ईयूको टोलीले नेपालमा स्थलगत निरीक्षण गरेर फर्किएको छ । ईयूको टोलीले नेपाली उड्डयन क्षेत्रमा अपेक्षाभन्दा बढी सुधार भएको निष्कर्षसमेत निकालेकोले यही प्रतिवेदनका आधारमा आगामी नोभेम्बरभित्रै कालोसूचीबाट हट्ने बुझाइ अधिकारीको छ ।