निर्वाचन आयोगले टीकापुर घटनामा दोषी ठहर भइ हाल सजाय काटिरहेका रेशम चौधरीले दिएको उम्मेदवारी खारेज गरेको छ ।  आयोगले नागरिक उन्मुक्ति पार्टीको तर्फबाट बर्दिया–२ मा प्रतिनिधिसभा सदस्यको उम्मेदवारी दिएका उनको मनोनयन मंगलबार खारेज गरेको हो । 

निर्वाचन अधिकृत नगेन्द्र लम्सालले चौधरी जिल्ला अदालत कैलाली र उच्च अदालत डोटीबाट दोषी ठहर भएको र २०७४ फागुन १४ गतेदेखि निरन्तर कैदमा रहेको पुष्टि भएकाले उम्मेदवारी खारेज भएको बताए ।

चौधरीले २३ असोजमा आफ्ना प्रतिनिधि झकुप्रसाद चौधरीमार्फत उम्मेदवारी दर्ता गराएका थिए । तर उनको उम्मेदवारी विरुद्ध नेकपा माओवादी केन्द्रका उम्मेदवार सुरेश पन्थले निर्वाचन अधिकृतको कार्यालयमा उजुरी दिएका थिए ।
यस्तै कैलाली–५ मा उम्मेदवारी दिएका सोही पार्टीका लक्ष्मण थारुको उम्मेदवारी पनि खारेज भएको छ ।