नेकपा (एकीकृत समाजवादी)का अध्यक्ष माधव नेपालले मंसिर ४ गतेको निर्वाचन पछि पनि अहिलेका सत्तारूढ गठबन्धनकै सरकार बन्ने बताएका छन् । आइतवार काठमाडौं–२ को चुनावी कार्यक्रमलाई सम्बोधन गर्दै नेपालले भने, ‘भविष्य पनि गठबन्धनकै रहेको छ । वर्तमानका प्रधानमन्त्री यही हुनुहुन्छ । भविष्यका प्रधानमन्त्रीहरु पनि यही हुनुहुन्छ । काठमाडौं– २ का लागि मन्त्रिपरिषदले निर्णय गरेर हल गर्नुपर्ने समस्या भए भने पनि सहजै समस्या समाधान गर्न सकिन्छ ।’ 

संविधान र लोकतन्त्र नै धरापमा परिसकेको अवस्थामा वाम–लोकतान्त्रिक गठबन्धनले जोगाएकाले आगामी चुनावमा गठबन्धनलाई चुनाव जिताउनुपर्ने उनले बताए । 

गठबन्धनका कार्यकर्ताले प्रतिष्ठाको विषय बनाउनुपर्ने उम्मेदवार काठमाडौं–२ ले पाएको नेपालले बताए ।

गठबन्धनले काठमाडौं–२ मा माओवादी नेतृ ओनसरी घर्तीलाई उम्मेदवार बनाएको छ । 

देशले अहिले प्रजातन्त्र माग गरिरहेको भन्दै गठबन्धनले चुनाव जिते मात्रै त्यो सम्भव हुने उनले बताए । ‘देशले लोकतन्त्रको माग गरेको छ । देशले निरङ्कुशता, व्यक्तिवाद, सर्वसत्तावादको माग गरेको होइन । हामी जनताको अधिकारको पक्षमा रहेका छौँ’, नेपालले भने ।