निर्देशक प्रदीप भट्टराईका प्रदर्शनमा आएका तीनवटै फिल्म बक्स अफिसमा सुपरहिट छन् । पहिलो फिल्म ‘जात्रा’, दोस्रो ‘शत्रु गते’ र तेस्रो ‘जात्रै जात्रा’ उनले निर्देशन गरेका सफल फिल्महरू हुन् । 

लगातार तीनवटा हिट फिल्म दिएका उनको नयाँ फिल्म ‘महापुरुष’ यही कात्तिकको ११ गतेदेखि देशव्यापी प्रदर्शनमा आउँदैछ । सफल फिल्म दिइरहेका जो–कोही नयाँ फिल्म पनि सफल हुनुपर्ने दबाबमा देखिन्छ । हालसम्म तीनवटा फिल्म निर्देशन, तीनवटै सफल दिएका प्रदीपमा पनि ‘महापुरुष’ चल्नैपर्ने दबाब देखिन्छ । यद्यपि, फिल्मको व्यापारलाई लिएर आफूमा डर भने कत्ति पनि नरहेको उनी बताउँछन् । 

‘मलाई सुटिङमा जानुअगाडि डर लाग्छ । स्क्रिप्ट लक गर्नुअगाडि एकदमै डराउँछु’ मंगलवार राजधानीमा आयोजना गरिएको पत्रकार सम्मेलनमा उनले भने, ‘फिल्म सुटिङ भएपछि डर नै लाग्दैन ।’ स्क्रिप्ट लक गर्नुअगाडि अघिल्ला फिल्मजस्तो हुने हो कि होइन ? त्यस्तो भयो/भएन भनेर आफूमा डर हुने उनको भनाइ थियो ।  ‘महापुरुष’ को विषयवस्तु नै बलियो भएकाले पनि डर नभएको उनी बताउँछन् । 

‘हामी सामान्य विषयमा पनि ठिकै लेभलको फिल्म बनाइरहेका थियौँ । यसमा त खिचिदिए मात्रै पनि राम्रो हुने खालको विषयवस्तु उठाएका छौँ’, उनी भन्छन्, ‘इन्टरटेन्मेन्टको हिसाबले हामीलाई अलिकलि ज्ञान भएको हुनाले त्यो भइहाल्छ । विषयवस्तुका हिसाबले पनि यो यत्तिकै क्यामेरा लगाएर खिचे पनि राम्रो हुन्छ भन्ने खालको कथा हो । त्यसकारण डर कत्तिपनि छैन ।’ 

प्रदीप स्वयंको कथा रहेको ‘महापुरुष’मा मदनकृष्ण श्रेष्ठ, हरिवंश आचार्य, गौरी मल्ल, रविन्द्र सिंह बानियाँ, राजाराम पौडेल, अरुण क्षेत्री, अन्जना बराइलीलगायतको अभिनय छ । 

यसअघि ‘टलकजंग भर्सेस टुल्के’, ‘जात्रा’ र ‘जात्रै जात्रा’ निर्माण गरेको पट्कोण आर्टस्को ब्यानरमा फिल्म निर्माण भएको हो । रविन्द्र सिंह बानियाँ कार्यकारी निर्माता रहेको फिल्मको निर्मातामा म्याक्स दिपेश खत्री छन् । भाइटीकाको भोलिपल्टदेखि प्रदर्शनमा आउने फिल्म समीक्षात्मक र व्यापारिक दुवै हिसाबमा राम्रो हुने आकलन छ ।