रुपन्देहीको सिद्धार्थनगर नगरपालिका प्रमुख इस्तियाक अहमद खानले निर्वाचन आचारसंहिता विपरीत गृहमन्त्री तथा रुपन्देही ३ का प्रतिनिधि सभा सदस्य पदका उम्मेदवार बालकृष्ण खाणको पक्षमा मत माग्दै हिँडेका छन् । 

निर्वाचन आचारसंहिता २०७९ को दफा ५ मा स्थानीय सरकारका प्रमुखले कुनै राजनीतिक दल वा उम्मेदवारको पक्षमा वा विपक्षमा प्रचार–प्रसारमा संलग्न हुन नपाउने व्यवस्था छ । तर, खान सोमवार खाणको पक्षमा भोट माग्दै भैरहवाको बैंक रोड, मिलनचोकलगायतका घरदैलोमा सहभागी भएका थिए । 

प्रमुख खानले गृहमन्त्रीको घरदैलोको क्रममा भेट भएर फोटो खिचेको तर आफूले उनको पक्षमा भोट नमागेको बताए । गृहमन्त्री खाणले घरदैलो गर्दा मेयर पनि सहभागी भएको र गौतमबुद्ध विमानस्थलमा ठूलो संख्यामा रोजगारी खुल्ने र त्यहाँ रोजगारी दिलाउने प्रलोभन देखाएर मत मागेको भन्दै आलोचना हुने गरेको छ ।