नेपाली कांग्रेसका प्रवक्ता डा. प्रकाशशरण महतले चुनावपछि बन्ने नयाँ सरकारको प्रधानमन्त्री शेरबहादुर देउवा हुने दाबी गरेका छन् ।

नेता महतले सत्ता गठबन्धन दलमा सबैभन्दा ठूलो दल कांग्रेस भएको हिसाबले निर्वाचनपछिको प्रधानमन्त्री पनि कांग्रेस सभापति देउवा हुने बताए । 

बुधवार बिहान बुटवलमा आयोजित पत्रकार सम्मेलनमा नेता महतले कांग्रेसभित्र पनि देउवा प्रधानमन्त्री बन्ने कुरामा सर्वसम्मत निर्णय हुने दाबी गरे । ‘गठबन्धन दलबाट जोसुकै नेता अघि सरे पनि जनमत बढी भएको दलको हिसाबले अबको प्रधानमन्त्री शेरबहादुर नै बन्नुहुनेछ,’ उनले भने, ‘कांग्रेसभित्र पनि उहाँलाई प्रधानमन्त्री बन्नबाट कसैले रोक्न सक्दैन ।’

नेता महतले अहिलेको निर्वाचनमा लोकतन्त्र एवं संविधान संरक्षण पक्ष र विपक्ष गठबन्धन भएको भन्दै निर्वाचनमा लोकतन्त्र पक्षधरकै जीत हुने पनि दाबी गरेका छन् ।