नेकपा एमालेका अध्यक्ष केपी शर्मा ओलीले चितवनमा टिक्न नसक्ने भएपछि माओवादी केन्द्रका अध्यक्ष पुष्पकमल दाहाल ‘प्रचण्ड’निर्वाचन लड्न गोरखा जानु परेको टिप्पणी गरेका छन् । उनले आफ्नै जिल्लामा निर्वाचन लड्न नसकेर गोरखा जाने प्रचण्डलाई स्वदेश तथा विदेशमा रहने कुनै पनि नेपालीले साथ दिन नहुने तर्कसमेत गरे । 

प्रवासी नेपाली मञ्चको प्रथम अन्तर्राष्ट्रिय अधिवेशनको शनिवार काठमाडौंमा उद्घाटन गर्दै ओलीले प्रचण्डले आफ्नै नेतृत्वमा चलाएको युद्धका कारण धेरै नेपालीले बेसहारा जीवन गुजार्नु परेको उल्लेख समेत गरे । प्रचण्ड सशस्त्र युद्धका कारण पीडामा परेकाहरूलाई बेवास्ता गरेर आफ्ना परिवार र आफ्न्तको हितमा मात्रै लागिपरेको उनको आरोप थियो । 

‘देशमा १७ हजार मानिस मारिए । विधवा छन कति ? एकल छन् कति ? टुहुराटुहुरी छन् कति ? बेसहारा बुबा, आमाहरू कति छन् कति ? शरीरमा गोली लिएर, अंगभंग भएर ह्वील चियरमा लौरा टेकेर, बैशाखी टेकेर घसारिएर कोही हिँडेका छन् । कोही उठ्न सक्ने अवस्था छैन । उनीहरूले नियमित रुपमा उपचार गराइरहनु परेको छ । अनेक पिटाइका कारणले, यातनाका कारणले । अरु विभिन्न देशका इफेक्ट । तर, सञ्चालन गर्ने नेता, तिनका परिवार, तिनका आफन्त मैले भनिरहन परेन’, ओलीले भने, ‘त्यस्ताका पछाडि नेपालभित्र मात्रै होइन, जो आफ्नै गाउँ चितवनमा टिक्न नसकेर भागेर गोरखा जान्छ । अब विदेशमा त्यस्ताका पछाडि लागेर संगठन बनाएर हुन्छ के ? त्यो भन्दा त बरु चुप लागेर सुति-खेती गरेर खाए हुन्छ नि । विदेशमा जानु छ, प्रचण्डको संगठन बनाउनु छ । यो कुराबाट सचेत गराएर ती साथीभाईलाई उठाउने कसले ? त्यसबाट उन्मुक्ति दिने कसले ? यसको जिम्मा प्रवासी नेपाली मञ्चले लिनुपर्छ ।’

ओलीले आगामी निर्वाचनपछि एमाले एक्लैले बहुमतको सरकार बनाउने दाबीसमेत गरे । उनले सत्तारुढ गठबन्धनले आगामी निर्वाचनमा जनमत पाए लुटपाट शुरु हुने र देश कंगाल बन्ने जिकिरसमेत गरे । उनले सत्तारुढ गठबन्धन मृत अवस्थामा पुगिसकेकाले यसले देशको, जनताको माया नगरेको समेत बताए । 

‘यो अहिलेको जुन गठबन्धन छ । यिनीहरूको मुख ६ तिर फर्केको छ । मैले धेरै ठाउँमा भन्ने गरेको छु–छ तिर फर्केका छन् । यिनको केही विचार छैन । तर, चपाएको चपाएकै छ । अब यो मंसिर ४ को निर्वाचनले यसको बीचमा फैसला गर्नुपर्ने छ । अहिले मैले भनेको खन्चुवा गठबन्धन, भिजनहीन, गन्तव्यहीन, नीतिहीन, थितिहीन, विधिहीन यसले जनता देख्दैन । देशको किन्चित माया छैन । यो पहिल्यै मरिसक्यो । अब त्यस स्थितिबाट देशलाई बचाउनका लागि यो १६ महिनामा कंगाल पार्नेहरूले जनादेश पनि पाए भने, परमादेश होइन, जनादेशबाट पनि आयौँ हामी भन्ने मौका पाएभने यिनले त कसरी लुट्छन होला । लखनउ लुट भनिन्थ्यो । त्यसमा त गहनामात्रै लुटिन्थे । सुन, चाँदी, हिरा, मोती मात्रै लुटिन्थ्यो । यिनले पर्दा, झ्याल, ढोका पनि फुटाउन लाग्दछन् । यस्तो लुट हुन्छ । र, देश कंगाल हुन्छ’, ओलीले भने, ‘आज नेपाललाई चाहिएको भनेको बलियो राष्ट्रिय शक्ति हो । वीथ मिसन, वीथ भिसन, वीथ पोलिसिज, वीथ प्रोग्राम । एमाले एक्लै सरकार बनाउन सक्छ । बहुमत ल्याउन सक्छ । बहुमतको सरकार बनाउन सक्छ । तर, यसको अर्थ हामी कसैलाई सरकारमा लिँदैनौं भन्ने होइन । तर नेकपा एमालेको अघि सारेको मिसन, भिजन कुनै पनि कुरामा तलमाथि नपर्ने गरी अरु पार्टीहरू पनि एमालेको सरकारमा सहभागी हुनेछन् ।’