नेपाली कांग्रेसका नेता तथा पूर्व उपसभामुख पुष्पा भुसालले नेपालकै सबैभन्दा ठूलो शीतगंगा नगरपालिकाको विकासका लागि विशेष क्षेत्र बनाउने बताएकी छन् ।

शीतगंगा नगरपालिका–१२ रजियामा भएको चुनावी प्रचारप्रसार कार्यक्रमलाई सम्बोधन गर्दै अर्घाखाँचीबाट नेपाली कांग्रेसको तर्फबाट प्रतिनिधिसभा सदस्य पदका उम्मेदवार भुसालले भौगोलिक अवस्थाले जटिल रहेको शीतगंगा नगरलाई विशेष क्षेत्र बनाएर विकासको नमूना बनाउने प्रतिबद्धता व्यक्त गरेकी हुन् ।

रोजगारी र शिक्षाको कारण गाउँमा मानिस बसाइँसराइँ गरेको बताउँदै अर्घाखाँचीमा सुविधासम्पन्न कलेज र प्राविधिक विषय पढाइ हुने कलेज खोल्नुपर्ने बताइन् ।

उनले अर्घाखाँचीका युवालाई कृषि, पशुपालन र पर्यटनको माध्यमबाट स्वरोजगार बनाउने बताइन् । अर्घाखाँची प्रदेशसभा (२) का उम्मेदवार कमलप्रसाद भुसालले नेपाली कांग्रेसको नेतृत्वमा हरेक आन्दोलन र परिवर्तन भएको बताएका छन् ।