काठमाडौं २६ साउन– पशुपति आर्यघाटमा रहेको नेपालको एक मात्र विद्युतीय शवदाह गृह एकमहिना पछि पुनः संचालनमा अाएको छ । मेसिन बिग्रेका कारण असार २० गते देखि बन्द रहेको शवदाह गृह करिव एक महिनापछि मंगलवारबाट संचालनमा आएको पशुपति विकास क्षेत्र कोषले जनाएको छ ।

नेपालमा पहिलो पटक बनाइएको विद्युतीय शवदाह गृहमा प्राविधिक समस्या हुँदा पुनः मर्मत गरिएकाले एक महिना बन्द गर्नुपरेको कोर्षका कार्याकारी निर्देशक रमेश कुमार उप्रेतीले लोकान्तरलाई बताए ।

‘विद्युतीय मेसिनबाट संचालन हुने भएकोले केही प्राविधिक समस्या आएकाले केहि समय बन्द भएको थियो । हिजोबाट सुचारु भईसकेको छ’ उप्रेतीले भने । पुनः सञ्चालनमा आएकै दिन मंगलवार ६ वटा शब दाह गरिएको उनले बताए ।

पशुपति आर्याघाटमा अहिले दुईवटा विद्युतीय शवदाह गृह रहेकोमा १५–१५ दिनमा परिवर्तन गरेर एउटामात्र संचालन हुने गरेको छ । २०७२ माघ १० गतेबाट संचालनमा आएको विद्युतीय शवदाह गृहमा अहिलेसम्म पाँच हजार ७ सयभन्दा बढी शब जलाइएको छ । ‘पाँच हजार भन्दा बढीको शव दाह सम्पन्न भएको छ, अहिले दाउरा भन्दा विद्युतीयबाट गराउन चाहानेको संख्या बढी छ’ उप्रेतीले भने ।

विद्युतीय मेसिनबाट शब जलाउँदा वातावरणमा वायु प्रदुषण कम हुने, समयको बचत हुने र आर्थिक स्थिति कमजोर हुनेहरुलाई पनि सहज हुने कोषका निर्देशक उप्रेतीले बताए ।

‘यसलाई अभियानको रुपमा देशभर संचालन गर्न सक्यौं भने धेरै सहज हुन्छ । शवदाहगृह नेपालको अन्य ठाउँमा पनि संचालन हुनुपर्छ,’ उप्रेतीले लोकान्तसँग भने ।

आर्यघाटमा भेटिएका सर्वसाधारणहरुपनि विद्युतीय शवदाह गृहबाट शवको अन्त्येष्टि गर्न सहज हुने बताउँछन् । विरामी भएर कपिलवस्तुबाट वीर अस्पतालमा ल्याइएको आफन्तको मृत्यु भएपछि विद्युतीय शवदाहगृहबाट शवको अन्त्येष्टि गर्न लागेको मृतकका आफन्त भुपेन्द्र अर्यालले बताए ।

दाउराबाट चारघण्टा लाग्ने तर विद्युतीय मेसिनबाट एक घण्टामा सकिने भएकोले धेरैले विद्युतीय मेसिन रोज्ने गरेका छन् । मलामी आएका युवराज पराजुलीले पनि शव अन्त्यष्टि गर्न विद्युतिय मेसिन प्रभावकारी हुने बताए । ‘आखिर प्रकृया एउटै हो । दाउरामा जलाउनु भन्दा विद्युतीय गर्दा सजिलो र सस्तो पनि छ’ उनले भने ।

बर्सातको समय तथा हावाहुरी र पानी परेको समयमा पनि विद्युतीय मेसिनबाट शव जलाउन चाहानेको संख्या बृद्धि भएको छ । पशुपति आर्यघाटमा दैनिक १२ देखि ४० जना सम्मको दाहसंस्कार हुने गरेको कोषका अधिकारी बताउँछन् ।