नेकपा एमालेको गोरखा जिल्ला कमिटीले पुनः मतदानको माग गरेको छ । 

गोरखाको निर्वाचन क्षेत्र नम्बर १ र २ मा सत्तारुढ गठबन्धनकोतर्फबाट निर्वाचन विरोधी गतिविधि भएको भन्दै त्यसको छानविन गरेर पुन निर्वाचन गर्न एमाले जिल्ला कमिटीले माग गरेको छ । 

आइतबार एमालेको गोरखा जिल्ला कमिटीका सचिव काजीराम रोकाले विज्ञप्ति प्रकाशन गरेर निर्वाचन विरोधी घटनाको छानविन गर्न निर्वाचन आयोगको ध्यानाकर्षण गराएका छन् । 

गोरखाका कपितय मतदान केन्द्रमा अनुपस्थिति र मृतकका नामबाट समेत मतदान भएको त्यसको विरोध गर्दा उम्मेदवारका प्रतिनिधिमाथि हातपाथ भएकोभन्दै एमाले गोरखा जिल्ला कमिटीले विरोध जनाएको छ । 

गोरखाको विन्द्रावती माध्यामिक विद्यालय, बालकल्याण आधारभूत विद्यालय, सरस्वती आधारभूत विद्यालय, हिमालय माध्यामिक विद्यालय, सूर्यज्योती माध्यामिक विद्यालय र पार्वती आधारभूत विद्यालयमा सत्तारुढ गठबन्धन दलबाट निर्वाचन विरोधी गतिविधि भएको आरोप लगाएका छन् ।