सिन्धुपाल्चोकको प्रदेशसभा निर्वाचन क्षेत्र १(२) मा नेकपा माओवादी केन्द्रका सरल सहयात्री पौडेल विजयी भएका छन् ।

गत आइतवार सम्पन्न प्रतिनिधिसभा तथा प्रदेशसभा निर्वाचनको मतपरिणामअनुसार पौडेल १७ हजार २५६ मतसहित विजयी भएका हुन् ।

उनका निकटतम प्रतिद्वन्द्वी नेकपा एमालेका होमनारायण श्रेष्ठले १३ हजार १३ मत प्राप्त गरेका छन् ।

सिन्धुपाल्चोक–२ प्रदेशसभा (१) मा पनि माओवादी केन्द्रका युवराज दुलाल विजयी भएका छन् । उनले २० हजार ९०६ मत प्राप्त गरेका छन् । उनका निकटतम प्रतिद्वन्द्वी एमालेका अमानसिंह तामाङले १२ हजार १३९ मत प्राप्त गरेका छन् ।

२ प्रतिनिधिसभा र ४ प्रदेशसभा रहेको जिल्लामा १ प्रतिनिधिसभा र ३ प्रदेशसभाको अन्तिम मतपरिणाम सार्वजनिक भएसँगै जिल्लामा गठबन्धनका तर्फबाट  नेपाली कांग्रेस १ र माओवादी केन्द्रले ३ गरी ४ उम्मेदवार विजयी भइसकेका छन् ।

प्रतिनिधिसभा–२ मा पनि गठबन्धनका साझा उम्मेदवार कांग्रेसका मोहनबहादुर बस्नेत २१ हजार ७४९ मतसहित अग्रतामा छन् । उनलाई एमालेका शेरबहादुर तामाङले १२ हजार ४४० मतसहित पछ्याइरहेका छन् ।