शुक्रबार राति साढे ११ बजेसम्मको मतपरिणामअनुसार प्रतिनिधिसभा सदस्यमा १३५ जना उम्मेदवार विजयी भएका छन् । प्रत्यक्षको कुल १६५ सिटमध्ये प्रतिनिधिसभा सदस्यमा राजनीतिक दल र स्वतन्त्रबाट उम्मेदवारी दिएका १३५ जना निर्वाचित भएका हुन् । 

जसअनुसार नेपाली कांग्रेसले सर्वाधिक ४५ सिटमा जित हासिल गरेको छ ।  एमालेले ३७ स्थानमा जितेर कांग्रेसलाई पछ्याइरहेको छ । नतिजाअनुसार कांग्रेसले एमालेले भन्दा ८ सिट बढी जितसिकेको छ । यस्तै मतगणना भइरहेका ९ र एमालेले ७ स्थानमा अग्रता बनाइरहेको छ ।

यसैगरी नेकपा माओवादी केन्द्रले १४ स्थानमा जित हाँसिल गरेको छ भने एकीकृत समाजवादी पार्टीले १० सिट जितेको छ । यस्तै पहिलो पटक निर्वाचनमा सहभागी भएको राष्ट्रिय स्वतन्त्र पार्टीले ७ सिट जित्दा स्वतन्त्र उम्मेदवारसहित राप्रपा, नेमकिपा, नागरिक उन्मुक्ति पार्टी, जनमोर्चालगायतका पार्टीेले २२ सिट जितेका छन् । 

यस्तै माओवादीले अझै ५ स्थानमा अग्रता बनाएको छ भने राष्ट्रिय स्वतन्त्र पार्टीको एक स्थानमा अग्रता छ । यस्तै साना पार्टीका उम्मेदवारहरु ७ स्थनमा अगाडि छन् । यसैबीच तीन वटा निर्वाचन क्षेत्रमा भने अझै मतगणना हुन सकेको छैन । दोलखा, स्याङ्जा २ र बाजुरामा मतगणना सुरु हुन नसकेको हो । त्यहाँ विवाद समाधानको पहल भइरहेको निर्वाचन आयोगको भनाइ छ ।