मंसिर ४ गते सम्पन्न प्रतिनिधिसभा र प्रदेशसभा सदस्य निर्वाचनको कर्णाली प्रदेशका १० जिल्लाका १२ निर्वाचन क्षेत्रको नतिजा आइसकेको छ ।

अन्तिम नतिजाअनुसार प्रतिनिधिसभामा नेकपा माओवादी केन्द्र र नेपाली कांग्रेसले समान ४–४ सिट जितेका छन् भने नेकपा एकीकृत समाजवादीले ३ सिट जितेको छ ।

राप्रपाले एउटा सिटमा जीत हात पार्दा नेकपा एमाले शून्यमा झरेको छ ।

विक्रम संवत् २०७४ सालको निर्वाचनमा कर्णालीका १२ मध्ये ६ क्षेत्रमा एमालेले जीत हासिल गरेको थियो तर कर्णालीमा यसपटक प्रतिनिधि सभातर्फ एमाले शून्य भयो । 
 
प्रत्यक्ष र समानुपातिक गरी कर्णाली प्रदेशसभा ४० सदस्यीय बन्ने छ । निर्वाचनको नतिजा अनुसार प्रदेशमा बहुमतको सरकार बनाउन २१ सदस्य आवश्यक पर्छ । प्रदेशका २४ निर्वाचन क्षेत्रमध्ये गठबन्धनभित्र रहेका दल माओवादी केन्द्र र कांग्रेसले प्रत्यक्षतर्फ १८ सिट जितेका छन् भने एमालेले प्रदेशतर्फ ५ सिटमा जीत हात पार्दा १ जना स्वतन्त्र सदस्यमा प्रवेश गर्दैछन् ।

पार्टीगतरूपमा हेर्दा कांग्रेसका ९ र माओवादी केन्द्रले पनि ९ सिटमा जितेका छन् ।

प्रत्यक्षमा सबै नतिजा आउँदा अहिलेको कांग्रेस–माओवादी गठबन्धनले सरकार बनाउने देखिन्छ । कांग्रेस–माओवादीको गठबन्धन रहेको खण्डमा समानुपातिक सहितको मत जोड्दा कर्णालीमा दुईतिहाइको सरकार बन्ने देखिन्छ । 

अहिलेसम्मको समानुपातिकको नतिजाको प्रतिशतलाई हेर्ने हो भने कर्णालीमा एमालेको बढीमा ५ सिट आउने देखिन्छ । एमालेको ५ सिट समानुपातिकतर्फ आएका खण्डमा पार्टीको प्रदेशसभा सदस्य संख्या १० पुग्नेछ भने गठबन्धनमा आवद्ध दलको समानुपातिकतर्फ ११ सिट आउने देखिन्छ । यसमा माओवादी केन्द्रको ६ र कांग्रेसको ५ सिट समानुपातिकमा आउने संकेत देखिन्छ ।

यसरी कांग्रेस र माओवादीका प्रदेशसभा सदस्यको संख्या २९ हुनेछ । बहुमतको सरकार गठनका लागि २१ सदस्य आवश्यक पर्छ भने यी दुवै दलसँग दुइतिहाइभन्दा बढी सदस्य हुनेछन् ।

सत्ता समीकरण बदलिएको खण्डमा ३ वटै पार्टीले आफ्नो नेतृत्वमा सरकार गठन गर्नका लागि पहिलो प्रयास गर्नेछन् । समीकरण फेरिएको खण्डमा प्रदेश सरकार गठनका लागि एमाले निर्णायक ‘पोजिसन’मा हुनेछ ।