सन् १९३० मा पहिलो फूटबल विश्वकप खेलिएको थियो ।

उक्त विश्वकपमा अनेकौं रमाइला घटना भएका थिए । ती घटनाहरूलाई दी अप्शट नामक ट्विटर प्रयोगकर्ताले थ्रेड बनाएर प्रस्तुत गरेका छन् । 

उनका अनुसार,

पहिलो विश्वकपमा रेफ्रीहरूले सुट लगाएर खेलाएका थिए । बोलिभियाका खेलाडीहरूले बेरेट नामक टोपी लगाएर फूटबल खेलेका थिए । अनि रोमानियाको टोलीलाई त्यहाँका राजाले छनोट गरेका थिए । 

यी त सामान्य कुरा भए । यसभन्दा पनि आश्चर्यजनक कुराहरू उक्त विश्वकपमा भएका थिए । 

विश्वकप प्रतियोगिता उरुग्वेमा भएको थियो । त्यसमा भाग लिन युरोपेली टोलीहरू स्कटल्यान्डको एउटा जहाजमा बसी आन्ध्र महासागर पारि गएका थिए । 

उनीहरूले जहाजकै डेकमा अभ्यास गरेका थिए । उनीहरूले रियो पुगेर ब्राजिली खेलाडीलाई पनि सँगै राखेका थिए । 

विश्वकपको ट्रफी फिफाका तत्कालीन अध्यक्ष जुल्स रिमेले आफ्नो सुटकेसमा बोकेर गएका थिए । उनी पनि खेलाडीहरू चढेको जहाजमा नै बसेका थिए । 

अफ्रिकाको प्रतिनिधित्व गर्ने एक मात्र टोली इजिप्ट थियो । उनीहरू विश्वकपमा भाग लिन खोजेको भए पनि जहाज छुटेपछि जान पाएका थिएनन् । उनीहरूले फिफासँग माफी मागेका थिए अनि विश्वकपमा १३ टोली मात्र पुगेका थिए ।

प्रतियोगिता शुरू भएपछि अर्जेन्टिनाका खेलाडीहरूले धेरै किसिमका फट्याइँ गरेका थिए । 

उनीहरू चिलीविरुद्ध खेल्दा हिंस्रक झडप भएपछि प्रहरीले हस्तक्षेप गर्नुपरेको थियो । तर सेमीफाइनलमा उनीहरूले अमेरिकालाई ६–१ ले हराउँदा नराम्रा घटनाहरू भए । 

खेलको पहिलो हाफमा अर्जेन्टिनाका खेलाडीले खतरनाक ट्याकल गर्दा अमेरिकाका एक खेलाडीको खुट्टा भाँचियो । त्यसपछि दुवै पक्षका खेलाडीले बेस्सरी झगडा गरे । 

अर्जेन्टिनाका एक खेलाडीले अमेरिकी खेलाडीको मुखमा मुक्का हानेर चारवटा दाँत भाँचिदिए भने अर्का खेलाडीलाई पेटमा चोट लागेपछि अस्पतालमा बस्नुपर्‍यो । 

विश्वकपकै इतिहासको सबभन्दा हाँसउठ्दो घटना हुँदा अमेरिकी टोलीका व्यवस्थापक मैदानभित्र पसेर रेफ्रीसँग झगडा गरेका थिए । त्यसक्रममा उनी लडे अनि उनको गोजीमा रहेको बेहोश बनाउने झोल क्लोरोफर्मको बोतल फुट्यो । त्यसबाट निस्केको गन्धले उनलाई बेहोश बनायो अनि उनलाई स्ट्रेचरमा राखेर मैदानबाहिर लैजानुपरेको थियो । 

फाइनलमा उरुग्वेको भिडन्त आफ्नो दुश्मन छिमेकी अर्जेन्टिनासँग थियो । अर्जेन्टिनाका १५ हजारभन्दा बढी समर्थकहरू जहाज चढेर उरुग्वेको राजधानी मोन्टेभिडियोतर्फ गएका थिए ।

तर बाक्लो कुहिरो लागेपछि जहाज हराएको थियो अनि समर्थकहरू फाइनल सकिएको भोलिपल्ट मात्र पुगेका थिए । आफ्नो टोली फाइनलमा हारेको थाहा पाएपछि उनीहरूले दंगा मच्चाए । 

प्रतियोगिता सकिएपछि फर्किने क्रममा रोमानियाका मिडफील्डर आल्फ्रेड आइजनबेसर फेरारु बिरामी परे । जेनोआमा जहाज रोकिएपछि उनलाई अस्पताल लगियो । 

उनका साथी खेलाडीहरू उनीविना नै बुखारेस्ट पुगेका थिए । उनको मृत्यु भइसकेको भनी हल्ला पनि चल्यो । 

उनकी आमालाई समेत छोरा मरेको कुरामा विश्वास लागेको थियो र उनले अन्त्येष्टिको व्यवस्थापन गरेकी थिइन् । तर अन्त्येष्टिपछिको भोजको दिन फेरारु घर फर्किए । 

छोरालाई देखेर आमा ठाउँको ठाउँ बेहोश भइन् । 

फेरारु पनि पूरै निको भए अनि ओलम्पिकमा फिगर स्केटिङ तथा बबस्ले प्रतियोगितामा भाग लिए ।