सन् २०२२ को नोभेम्बर २१ तारिखबाट शुरु भएको फिफा विश्वकप फुटबल प्रतियोगिता डिसेम्बर १८ सम्म कतारमा भइरहेको छ ।

प्रतियोगिताअन्तर्गत प्रारम्भिक चरणमा ८ समूहमा विभाजित रहेर ३२ राष्ट्र प्रतिस्पर्धामा थिए । जसमा हालसम्म प्रि–क्वाटर फाइनलमा पुग्ने १६ राष्ट्रको टुंगो लागिसकेको छ भने बाँकी १६ राष्ट्र प्रतियोगिताबाट बाहिरिसकेका छन् । 

शनिबारबाट प्रि–क्वाटर फाइनलका खेलहरु शुरू हुँदैछन् । विश्वकप फुटबल मध्यपूर्वमा भएको यो नै पहिलो अवसर हो ।

यससँगै कतार विश्वकप फुटबल आयोजना गर्ने पहिलो अरब देश बनेको छ । सन् २०२२ को विश्वकप फुटबल सञ्चालनका लागि सन् २०१० मा मतदानमा कतारले बाजी मारेको थियो । उसले अमेरिका, दक्षिण कोरिया, जापान र अस्ट्रेलियालाई पछाडि पारेर यो अवसर आफ्नो पोल्टामा पारेको थियो । 

यतिबेला कतारमा भइरहेको फिफा विश्वकप हेर्नेहरुको भीड विश्वभर नै छ । नेपालमा पनि फिफा विश्वकप हेर्नका लागि होटल, रेष्टुराँहरु राति प्रायः बुक हुने गरेका छन् । यतिसम्मकी होटल, रेष्ुटराँ मात्रै होइन, सडकमै प्रोजेक्टर राखेर विश्वकप हेर्ने जमात पनि कम छैन । 

फुटबलका महारथी मानिने देशहरुले कमजोर प्रदर्शन गर्दा विश्वकप खेल नै रोचक भइरहेको छ । नकआउट चरणमा पुगेका देशहरुको समीकरण पनि हेर्न लायक बनिरहेको छ । आफ्नो मन परेको टिमलाई साथ, सहयोग गर्न रातभर जागा बसेर भएपनि समर्थकहरु विश्वकपका हरेक खेलहरु हेर्न छुटाउँदैनन् ।

नजिकको होटल, रेष्टुराँमा गएर प्रोजेक्टरमा खेल हेर्नेको जमात बढिरहेको छ । काठमाडौं उपत्यकाका विभिन्न होटलहरु राति पर्यटकहरुले होइन, विश्वकप हेर्नेहरुले भरिभराउ हुन थालेका छन् । होटलहरुले पनि विश्वकपका लागि छुट्टै प्याकेज निकालेका छन् । 

त्यतिमात्रै होइन, घरको आँगनमा नै प्रोजेक्टर राखेर विश्वकप फुटबल खेल हेर्नेहरुको जमात पनि बाक्लै छ ।