जनमत पार्टीका अध्यक्ष डा. सीके राउतले ‘गर या मर’को मनस्थितिमा काम गर्नुपर्ने अवस्था रहेको बताएका छन् ।

शनिबार जनमत पार्टीले काठमाडौंमा गरेको कार्यक्रममा बोल्दै उनले कतिपयले अन्तिम आशाकोरूपमा आफूहरुलाई व्याख्या गर्ने गरेको भन्दै जनमत पार्टीको जिम्मेवारी पनि त्यहीँ अनुसारको हुने उनले बताए । 

कार्यकर्तालाई सम्बोधन गर्दै उनले भने, ‘कतिपयले त अन्तिम आशा समेत भन्नुहुन्छ । मलाई त्यो शब्द प्रयोग गर्दा एकदम डर लाग्छ । अन्तिम आशा हो भनिदिनु हुन्छ । अन्तिम आशा किन खतरनाक लाग्छ भने हामीले यदि काम गर्न सकेनौ भने के हुन्छ ?’

जनताको विश्वास तोडियो भने देश निराशामा जाने भएकाले पनि जनताको अन्तिम आशालाई भरोसामा बदल्ने गरी काम गर्नुपर्ने उनले बताए । 

‘अन्तिम आशा तोडियो भने के हुन्छ त ? देश निराशामा जान्छ । जनता निराशामा जान्छन् । त्यो भएर यदि जनताले हामीलाई अन्तिम आशाको रुपमा देखेका छन भने हाम्रो पनि जिम्मेवारी त्यही स्तरको हुनुपर्छ। हाम्रो पनि मनस्थिति ‘डू एण्ड डाई’को हुनुपर्दछ’, राउतले भने ।

आगामी दिनमा समानता, भाइचारा र मुलुकको समृद्धिका लागि काम गर्न आफ्नो पार्टी प्रतिवद्ध भएर लागिपर्ने उनले बताएका छन् । 

सप्तरी २ बाट प्रतिनिधिसभा सदस्यमा निर्वाचित अध्यक्ष राउतले जनताले जनमत पार्टीलाई अन्तिम आशाको नजरले हेरेको भन्दै निराश हुन नदिने प्रतिवद्धता जनाए ।

एउटा व्यक्ति सांसद, मन्त्री वा प्रधानमन्त्री हुँदैमा केही गर्न नसकिने तर सबैको सहयोग पाए जनताको हितमा काम गर्न सकिने उनको भनाइ छ ।