आगामी महिना पुस १२ गतेदेखि लमजुङ सदरमुकाम बेंसीसहरमा ३० औं त्रिवेणी कप खुल्ला फुटवल प्रतियोगिता गरिँदै छ । त्रिवेणी युवा क्लब बेंसीशहरले पत्रकार भेटघाट गर्दै प्रतियोगिताबारे जानकारी गराएको हो ।

प्रतियोगितामा ४७ लाख १० हजार रूपियाँ खर्च हुने क्लवको अनुमान छ । प्रतियोगितामा १६ टिमले सहभागिता जनाउने आयोजकले जनाएको छ । सहजी खेल मैदान (त्रिवेणी रंगशाला) को इलाभेन ए साइडको खेलमैदानमा खेल खेलाइने छ ।

जिल्ला भित्र र बाहिरका अहिलेसम्म १० वटा टीम सहभागीका लागि सम्पर्कमा आएको र थप टिम पनि सहभागी हुने आयोजकको दावी छ । क्लबका अध्यक्ष विनोद गुरुङले प्रतियोगितामा पहिलो हुनेलाई नगद ५ लाख रूपियाँ, त्रिवेणी कप, स्वर्ण पदक र प्रमाणपत्र प्रदान गरिने छ । त्यस्तै, दोस्रो हुनेलाई ३ लाख रूपियाँ, रजत पदक र प्रमाणपत्र प्रदान गरिने छ । 

सेमिफाइनलका उपविजेता २ टिमलाई नगद ५०-५० हजार प्रदान गरिने उनले बताए । सर्वोत्कृष्ट खेलाडी र सर्वाधिक गोलकर्तालाई १५-१५ हजार रूपियाँ, स्वर्णपदक र प्रमाणपत्र प्रदान गरिने गुरुङले बताए ।

जिल्लाको ब्यापार व्यवसाय प्रवर्द्धनमा सहयोग गर्न र स्वच्छ मनोरञ्जन तथा खेल पर्यटनको विकास गर्ने लक्ष्यसाथ प्रतियोगिताको आयोजना गर्न लागेको आयोजकले जनाएको छ । दैनिक करिब ६ हजारका दरले करिब ५० हजारले प्रतियोगिताको अवलोकन गर्ने आयोजकले दावी गरेको छ ।