पाकिस्तान भ्रमणमा रहेको इंग्ल्यान्डले शृंखलाको दोस्रो टेस्ट २६ रनले जितेको छ । यससँगै उसले शृंखला जितेको हो । 

मुल्तानमा सोमवार सम्पन्न टेस्टमा ३५५ रनको लक्ष्य पछ्याएको पाकिस्तान ३२८ रनमै अलआउट भएको हो ।

इंग्ल्यान्डको जीतमा ह्यारी ब्रूक नायक रहे । उनले टीमको दोस्रो इनिङमा महत्त्वपूर्ण १०८ रन बनाएर पाकिस्तानसामु चुनौतीपूर्ण लक्ष्य खडा गर्न योगदान गरेका थिए । 

टस जितेर ब्याटिङ रोजेको इंग्ल्यान्डले पहिलो इनिङमा ५१.४ ओभरमा २५१ रन बनाएको थियो । बेन डकेटले सर्वाधिक ६३ र ओली पोपले ६० रनको योगदान गरे । 

पाकिस्तानका डेब्यु बलर अबरार अहमदले २२ ओभरमा ११४ रन खर्चेर सात विकेट हात पारेका थिए । 

जवाफमा पाकिस्तानले ६२.५ ओभरमा २०२ रन मात्र बनाउन सक्यो । उसका लागि कप्तान बाबर आजमले सर्वाधिक ७५ र साउद शकीलले ६३ रन बनाए । 

दोस्रो इनिङमा ब्रूकको शतकका साथै डकेटको ७९ रनको योगदानमा इंग्ल्यान्डले २७५ रन बनायो । अबरार अहमदले चार विकेट हात पारे । अहमदले समग्र म्याचमा ११ विकेट लिए । 

जीतका लागि पाकिस्तानले राम्रै गतिमा ब्याटिङ गरिरहेको थियो । तेस्रो दिनको खेल सकिँदासम्म यो खेलमा दुवै टोलीको उत्तिकै सम्भावना थियो । 

तर चौथो दिन टीमको स्कोर २९१ हुँदा साउद शकील ९४ रन बनाएर आउट भएपछि पाकिस्तानको हार अवश्यम्भावी बन्न गयो । उनीपछि आएका टेलएन्डरहरूले म्याच जोगाउनका लागि ठोस योगदान गर्न सकेनन् । 

मार्क वूडले शकील सहित माथिल्लो पंक्तिका चारजना पाकिस्तानी ब्याट्स्म्यानहरूलाई आउट गरी खेललाई इंग्ल्यान्डको पक्षमा पारे । 

पहिलो टेस्टमा पनि इंग्ल्यान्ड विजयी भएकाले यस टेस्टमा जीतसँगै शृंखला उसकै नाममा रह्यो । तेस्रो टेस्ट कराचीमा शनिवारबाट शुरू हुनेछ ।