नेकपा एमालेको तर्फबाट प्रतिनिधि सभा सदस्य पदमा निर्वाचित सुनिता बरालले अध्यक्ष केपी ओलीनिकट भएकाले मात्र आफू सांसद नभएको बताएकी छन् । समानुपातिकतर्फबाट सांसद भएकी उनलाई ओलीनिकट भएकाले सांसद बनाइएको भन्दै सहकर्मीहरूसमेतले आलोचना गरेपछि उनले आफूलाई पार्टी र शैक्षिक आन्दोलनमा योगदान दिएकैले सांसद बनाइएको दाबी गरेकी छन् । 

सांसद पदमा निर्वाचित भएको प्रमाण पत्र बुझेपछि लोकान्तरसँगको कुराकानीमा अनेरास्ववियुकी अध्यक्षसमेत रहेकी बरालले भनिन्, ‘म अध्यक्ष कमरेडको नजिक भएकाले मात्र सांसद भएको भन्ने कुरामा सही होइन, मैले विद्यार्थी संगठनको नेतृत्व गरिरहेकै छु । हिजोदेखि सामाजमा देखिएको सबैखाले समस्यालाई उठान गरिरहेकै छु । शैक्षिक आन्दोलनको नेतृत्व गरिरहेकाले पनि योगदानको आधारमा सांसद बनाइएको हुनुपर्छ ।’

सांसद बरालले प्रतिनिधि सभा सदस्यका जिम्मेवारीहरू परिभाषित नै हुने भन्दै उक्त जिम्मेवारीलाई सशक्त ढंगले पूरा गर्ने बताइन् । ‘हिजो पनि फरक ढंगले सामाजिक विषयवस्तुमा काम गरिरहेकै थिएँ । हिजो पनि आफूले देखेको विभिन्न विषयवस्तुलाई विभिन्न मञ्चमा उठाउँदै आएकै हो । अब प्रतिनिधि सभामा उठाउँछु फरक यति हो’, उनले भनिन्, ‘म आफू शिक्षा क्षेत्रसँग जोडिएकाले शिक्षा क्षेत्रलाई बढी प्राथमिकतामा राखेर संसद्मा उठाउँछु ।’