राष्ट्रिय प्रजातन्त्र पार्टीका अध्यक्ष राजेन्द्र लिङदेनले नवनिर्वाचित सांसदहरूलाई विदेशी दूतावासहरूले कार्यक्रमहरूमा बोलाएमा पार्टीको अनुमति बिना नजान निर्देशन दिएका छन् । उनले शुक्रवार पार्टी कार्यालयमा आयोजित कार्यक्रममा पार्टीबाट निर्वाचित सांसदहरूलाई त्यस्तो निर्देशन दिएका हुन् । 

दूतावासले बोलाएर रक्सीमासु खुवाउने भएमा त्यस्तो नगर्न उनले निर्देशन दिँदै सांसदहरूलाई अनुशासन र मर्यादामा बस्न पनि आग्रह गरे । 

उनले भने, ‘अब तपाईंहरूलाई कहिलेकाहीँ अन्तर्वार्तामा बोलाउँछन् । कहिले कुनै विदेशी दूतावासहरूले कार्डहरू पठाइराख्छ । ए मलाई फलाना दूतावासले बोलाएको छ भनेर खुरुर कुदेर गएर त्यहाँ रक्सी खानेले रक्सी खाने मासु खान पाउनेले मासु खान कुदिहाल्नु हुन्न । पार्टीलाई सोधेर जानुपर्छ । हिजोअस्ति तपाईं व्यक्तिगत रुपमा जहाँ जानुहुन्थ्यो, जहाँ नाच्नुहुन्थ्यो केही छैन । तर अहिले केही मर्यादाहरू, केही जिम्मेवारीहरू छन् अब ।’ 

उनले पार्टीमा योगदान गरेका र क्षमता र सम्भावना भएका नयाँ व्यक्तिहरूलाई सांसद बनाइएको बताएका छन् । पार्टीमा नयाँ मानिसहरूलाई पनि अवसर दिनुपर्ने र फराकिलो दृष्टिकोण राख्नुपर्ने उनको भनाइ छ । पार्टी सदस्यहरूले पनि कडाइपूर्वक पार्टी अनुशासनको पालना गर्नुपर्ने उनले बताए ।