नेकपा एमालेका अध्यक्ष केपी शर्मा ओलीले निर्वाचनपछि देश असाधारण अराजकतातिर गएको दाबी गरेका छन् । 

एमालेका नवनिर्वाचित सांसदहरूलाई बधाई दिन मंगलवार काठमाडौंमा आयोजित कार्यक्रमलाई सम्बोधन गर्दै ओलीले देश सम्हाल्न नसकिने अराजकतातिर जान लागेको बताएका हुन् । 

‘असाधारण र अभूतपूर्व ढंगले अराजकतातिर गएको छ । आर्थिक हिसाबले सम्हाल्ने नसक्नेतिर देश गएको छ’, ओलीले भने । 

देशमा राजनीतिको मेनस्ट्रिम नै अराजकता हो कि भनेजस्तो भइरहेको ओलीले बताए । ‘अस्थिरता र अराजकता मौलाएको छ । त्यसले राजनीतिको मेनस्ट्रिम हो कि जस्तो बनाइरहेको छ’, ओलीले भने, ‘इतिहास चाहिँदैन, योगदानको अर्थ छैन, अनुभवको आवश्यकता छैन, बलिदानको अर्थ छैन भन्ने आइरहेको छ ।’

कतिपयले सत्य र निष्ठाको अर्थ नहुने गलत मान्यताहरू स्थापित गर्न खोजेको ओलीले बताए । 

‘सत्य र निष्ठाका कुनै अर्थ छैन भन्नेजस्ता गलत मान्यताहरू स्थापित हुन खोजिरहेको छ । अराजकतालाई आदर्श बनाउने ठाउँबाट अनुशासनमा लैजानेबारे चिन्तित छौँ’, उनले भने ।