नेकपा एमाले र माओवादी मिलेर फेरि वामपन्थी सरकार गठनको बहस चलिरहेको समयमा माओवादी अध्यक्ष पुष्पकमल दाहाल ‘प्रचण्ड’लाई भेटेका नेपाल समाजवादी पार्टीका एक नेताले अहिलेको गठबन्धनभित्रबाटै प्रधानमन्त्री बन्ने बताएका छन् । 

नेसपाका युवा नेता विश्वदीप पाण्डेले नयाँ प्रधानमन्त्री अहिलेको गठबन्धनबाटै बन्ने बताएका हुन् । पूर्वप्रधानमन्त्री डा. बावुराम भट्टराईनिकट पाण्डेले मंगलवार प्रचण्डसँग भेट गरेका थिए । 

‘नयाँ सरकार गठनबन्धन भित्रबाटै बन्छ, नयाँ समीकरण बन्ने सम्भावना छैन’, पाण्डेले लोकान्तरसँग भने । पहिलो कार्यकालको प्रधानमन्त्री को बन्ने भन्ने विषयलाई लिएर गठबन्धनमा सहमति जुट्न सकेको छैन ।

कांग्रेस सभापति शेरबहादुर देउवा प्रधानमन्त्रीमा दोहोरिन चाहेका छन भने प्रचण्ड प्रधानमन्त्री बन्न चाहिरहेका छन् । पूर्वप्रधानमन्त्री एवं नेसपा अध्यक्ष डा. बाबुराम भट्टराई गठबन्धनलाई कायम राख्दै पहिलो चरणमै प्रचण्डलाई प्रधानमन्त्री बनाउने लविङमा लागेका छन् । 

राष्ट्रपति विद्या भण्डारीले नयाँ प्रधानमन्त्री नियुक्तिका लागि आह्वान गरेसँगै दलहरूले नयाँ सरकार गठनको गृहकार्य शुरु गरेका छन् ।