राष्ट्रपति विद्यादेवी भण्डारीले मुलुकको अर्थतन्त्रले गम्भीर चुनौती सामना गरेको भन्दै उत्पादनमा जुट्नुपर्ने बताएकी छन् ।

आर्थिक मन्दी र व्यापार घाटाले मुलुकको विदेशी मुद्राको सञ्चितीमा ठूलो चाप परेको भन्दै उनले उत्पादन बढाउँदै पर्यटन प्रवर्द्धनमा लाग्नुपर्नेमा जोड दिइन् ।

बिहीवारदेखि बुटवलमा शुरू भएको १५औं औद्योगिक प्रदर्शनीको उद्घाटन गर्दै राष्ट्रपति भण्डारीले खेतीयोग्य जमिनको पूर्ण सदुपयोग गरेर  आर्थिक क्षेत्रका मेरुदण्ड किसानलाई राज्यबाट सहज सेवा उपलब्ध गरी देशको अर्थतन्त्रलाई बलियो बनाउन सकिने धारणा राखिन् ।

‘स्वदेशी उत्पादनको प्रयोग गर्न राज्यले प्रोत्साहन गर्नुपर्छ,’ राष्ट्रपति भण्डारीले भनिन्, ‘जलविद्युत्को अधिकतम खपत गरौं, कृषि उत्पादन बढाउँदै पर्यटन प्रवर्द्धनमा लाग्नु अहिलेको आवश्यकता हो ।’

स्वदेशी उत्पादन, प्रवर्द्धन र बजारीकरणमा औद्योगिक प्रदर्शनीले ठूलो टेवा पुर्‍याउने राष्ट्रपतिको विश्वास छ । ‘हाम्रा आफ्ना सभ्यता, मार्गदर्शन र आदर्श मानेर समृद्ध नेपाल निर्माणको आकांक्षालाई पूरा गर्नुपर्ने अहिलेको आवश्यकता हो,’ राष्ट्रपति भण्डारीले भनिन् ।

विश्वका बौद्धमार्गीहरूको आस्थाको केन्द्र लुम्बिनीलाई शान्ति शहरको रूपमा विकास गरी लुम्बिनीसँग जोडिएको बुद्धसँग सम्बन्धित क्षेत्रको पनि प्रचारप्रसार गर्नु आवश्यक रहेको उनको भनाइ छ । 

भैरहवामा सञ्चालनमा आएको गौतमबुद्ध अन्तर्राष्ट्रिय विमानस्थलले लुम्बिनी प्रदेशको आर्थिक विकासमा ठूलो योगदान पुर्‍याउने बताउँदै उनले पर्यटकलाई अन्य क्षेत्रमा पनि लैजानुपर्ने बताइन् ।

लुम्बिनी प्रदेशमा आर्थिक तथा औद्योगिक गतिविधिमा महिलाको सहभागिता उत्साहमूलक रहेको उनको भनाइ छ । त्यसको लागि औद्योगिक क्षेत्रमा आर्थिक र मानवीय लगानी बढाउनुपर्ने उनको भनाइ छ ।