जाँदाजाँदै लुम्बिनी प्रदेश सरकारले स्थायी राजधानी दाङको भालुवाङमा मुख्यमन्त्री सम्मेलन गर्ने भएको छ ।

आगामी पुस १५ गते सातै प्रदेशका मुख्यमन्त्रीहरूले राप्ती उपत्यकामा भेला भएर ५ वर्षे पहिलो कार्यकालको समीक्षा गर्नेछन् । 

सरकारबाट बिदा हुन लागेका मुख्यमन्त्रीहरूले सरकारका कामको समीक्षा र अब बन्ने सरकारलाई सुझाव दिनका लागि सम्मेलन आयोजना गरिएको प्रदेश सरकारका प्रवक्ता तथा आन्तरिक मामिलामन्त्री तिलकराम शर्माले जानकारी दिए । ‘५ वर्षे कार्यकालमा प्रदेश सरकारले गरेका कामको समीक्षा र आगामी नयाँ सरकारलाई सुझाव दिनका लागि सम्मेलन आयोजना गरेका हौं,’ उनले भने ।

सम्मेलनका लागि प्रदेश सरकारले आवश्यक तयारी समेत अगाडि बढाएको मन्त्री शर्माले बताए । प्रदेशको स्थायी राजधानी देउखुरीको भ्रमण गराएर मुख्यमन्त्रीहरूको सम्मेलन गर्न लागिएको लुम्बिनी प्रदेशका मुख्यमन्त्री कूलप्रसाद केसीले जानकारी दिए ।

२०७७ असोज २० गते प्रदेश सभाको बैठकले देउखुरीलाई लुम्बिनी प्रदेशको स्थायी राजधानी बनाउने प्रस्ताव पारित गरेको थियो । त्यसको झण्डै २६ महिनापछि स्थायी राजधानी कार्यान्वयनमा आएको छ ।

मुख्यमन्त्री कार्यालयले देउखुरीमा मंसिर २८ गतेदेखि काम शुरू गरिसकेको छ । अन्य मन्त्रालयहरू पनि अब छिट्टै नै सार्ने तयारी थालिएको छ । यसका लागि देउखुरीमा मन्त्रालयका भवनहरूको टुंगो लगाउने काम पनि अन्तिम चरणमा पुगेको मुख्यमन्त्री केसीले बताए । 

सम्मेलनमा लुम्बिनीका मुख्यमन्त्री कूलप्रसाद केसीसहित १ नम्बर प्रदेशका मुख्यमन्त्री राजेन्द्रकुमार राई, मधेश प्रदेशका मुख्यमन्त्री लालबाबु राउत, बागमती प्रदेशका मुख्यमन्त्री राजेन्द्रप्रसाद पाण्डे, गण्डकी प्रदेशका मुख्यमन्त्री कृष्णचन्द्र नेपाली, कर्णाली प्रदेशका मुख्यमन्त्री जीवनबहादुर शाही र सुदूरपश्चिम प्रदेशका मुख्यमन्त्री त्रिलोचन भट्ट सहभागी हुनेछन् । बागमतीका मुख्यमन्त्री पाण्डेले शुक्रवार राजीनामा दिइसकेका छन् । 

लुम्बिनी प्रदेश सभाको दोस्रो कार्यकालको पहिलो बैठक पनि स्थायी राजधानी दाङमै गर्ने गरी तयारी थालिएको छ । प्रदेशसभा भवनको निर्माण पूरा भई सम्पूर्ण व्यवस्थापनको काम समेत भएको हुँदा नवनिर्वाचित प्रदेश सांसद र लुम्बिनी प्रदेश सरकारको नयाँ बन्ने मन्त्रिमण्डललाई दाङको देउखुरीमै शपथ खुवाउने र प्रदेश सभाको बैठक पनि दाङमै राख्ने तयारी भएको छ ।