गत मंसिर ४ गते सम्पन्न प्रतिनिधिसभामा निर्वाचनमा नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल ‘प्रचण्ड’सँग निर्वाचनमा पराजय भाेगेका एमाले नेता अब्दुस मियाँले गोरखाली जनताले प्रचण्डको हरेक गलत कदमको विरोध गर्ने जिम्मा आफूलाई दिएको बताएका छन् । 

पोखरा अन्तर्राष्ट्रिय विमानस्थल उद्घाटनका सन्दर्भमा असहमतिहरू राख्दै उनले प्रधानमन्त्री प्रचण्डको आलोचना गरेका हुन् । पोखरा अन्तर्राष्ट्रिय विमानस्थलको निर्माण कार्य नसकिँदै हतारमा उद्घाटन गरिएको, आवश्यक तयारी नगरी हचुवाको भरमा उद्घाटन गरिएको भन्दै असहमति राखेका हुन् । 

सामाजिक सञ्जालमा सन्देश लेख्दै उनले भनेका छन्, ‘म उत्सुक छु, आज उद्घाटन हुने अन्तर्राष्ट्रिय विमानस्थलमा कुन देशबाट विमान आउँदैछ वा कुन देशमा विमान उडेर जान्छ ? सम्भवत, त्यसबारे कुनै तयारी भएकै छैन । उत्ताउला प्रधानमन्त्री कामकुरो नसकिँदै विमानस्थल उद्घाटन गर्न पोखरा पुग्दैछन् । यसो कर्मकाण्ड पुर्‍याउन एउटा लोकल जहाज ल्यान्ड गराउने अरे ।’ 

प्रचण्ड उनकै पार्टी एमालेको समर्थनमा प्रधानमन्त्री बनेका छन् । 

हेर्नुहोस् अब्दुसको सन्देश 

आज पोखरा अन्तराष्ट्रिय विमानस्थलको उद्घाटन हुँदैछ । प्रधानमन्त्रीज्यूले सो विमानस्थलको उद्घाटन गर्दै हुनुहुन्छ । 

म उत्सुक छु, आज उद्घाटन हुने अन्तर्राष्ट्रिय विमानस्थलमा कुन देशबाट विमान आउँदैछ वा कुन देशमा विमान उडेर जान्छ ? सम्भवत, त्यसबारे कुनै तयारी भएकै छैन । उत्ताउला प्रधानमन्त्री काम कुरो नसकिँदै विमानस्थल उद्घाटन गर्न पोखरा पुग्दैछन् । यसो कर्मकाण्ड पुर्याउन एउटा लोकल जहाज ल्यान्ड गराउने अरे । 

अर्को अचम्म, एउटा सामान्य विमानस्थल उद्घाटन हुँदा आज पोखरामा सार्वजनिक विदा दिइएको छ । यो विदाको औचित्य के हो, मैले चाहिँ बुझ्न सकिन । 

यतिखेर विभिन्न विध्यालय तथा क्याम्पसमा परीक्षा चलिरहेको छ । हठात् ‘राजाको उर्दी’ शैलीमा सार्वजनिक विदा घोषणा हुँदा विध्यार्थी तथा अभिभावकले जुन किसिमको अन्योलपूर्ण वातावरण भोग्नुपरेको छ, त्यसबारे प्रधानमन्त्री र उनले नेतृत्व गरेको सरकारले खासै वास्ता गरेजस्तो देखिन्न । 

नयाँ वर्षको पहिलो दिनमै प्रधानमन्त्रीको कार्यशैलीप्रति कटाक्ष गर्ने रहर थिएन । तर, प्रधानमन्त्रीका हरेक गलत कदमविरुद्ध आवाज उठाउने जिम्मेवारी मलाई गोरखाली जनताले दिएका छन् ।