नेकपा एमाले लुम्बिनी संसदीय दलको बैठकले दलको नेतामा पोलिटब्युरो सदस्य तथा प्रदेश सहइन्चार्ज लिला गिरीलाई सर्वसम्मत चयन गरेको छ । 

चेतनारायण आचार्यलाई उपनेता चयन गरिएको छ । आइतवार प्रदेशसभा सदस्यहरूको शपथ ग्रहणपछि देउखुरीमा बसेको बैठकले दुवैलाई सर्वसम्मत चयन गरेको हो ।

गिरी रूपन्देही–२(१) बाट र आचार्य अर्घाखाँची–१(२) बाट निर्वाचित सदस्य हुन् । उनीहरू दुवै पूर्वमन्त्री हुन् ।

सभामुख र मुख्यमन्त्री १ हप्ताभित्र सहमतिमा टुंगो लाग्ने समेत एमाले महासचिव शंकर पोखरेले जानकारी दिए । लुम्बिनीमा प्रत्यक्षतर्फ ५२ र समानुपातिक ३५ गरेर ८७ सदस्य प्रदेशसभा रहेका छन् । 

एमाले २९ सदस्यसहित सबैभन्दा ठूलो दल छ । नेपाली कांग्रेस २७, नेकपा माओवादी केन्द्र ९, राप्रपा ४, नागरिक उन्मुक्ति पार्टी ४, जनमत पार्टी ३, जनता समाजवादी ३, लोकतान्त्रिक समाजवादी ३, राष्ट्रिय जनमोर्चा १, नेकपा एकीकृत समाजवादी १ र स्वतन्त्र ३ प्रदेशसभा सदस्य छन् ।