कांग्रेस उपसभापति पूर्णबहादुर खड्काले सभापति शेरबहादुर देउवा र प्रधानमन्त्री पुष्पकमल दाहाल प्रचण्डबीच सौहार्दपूर्ण वातावरणमा छलफल भएको बताएका छन् । कांग्रेससँग विश्वासको मत माग्नका लागि सोमबार धुम्बाराही पुगेका प्रचण्डले आफूलाई विश्वासको मत दिन सभापतिसँग आग्रह गरेको खड्काले बताए । 

तर, यस सम्बन्धमा देउवाले एस अर नो (हुन्छ वा हुँदैन) भन्ने कुनै जवाफ नदिएको उल्लेख गर्दै खड्काले पार्टीमा छलफल गरेर टुंगोमा पुग्ने बताएको लोकान्तरलाई जानकारी दिए । ‘प्रधानमन्त्री प्रचण्ड आउनुभयो, भोलि विश्वासको मत लिँँदै छु हिजो हामी सँगै काम गरेका पार्टी हौँ विश्वासको मत दिनुस् म सहकार्य गरेर जान तयार छु भनेर भन्नुभयो’, खड्काले भने । 

 जवाफमा सभापतिले भोलि बिहान पौने ८ बजे पदाधिकारी बैठक तथा ९ बजे संसदीय दलको बैठक बोलाएको र त्यहाँ छलफल हुने जवाफ दिएको प्रचण्डलाई जानकारी गराएको बताए ।  । ‘साथीहरुसँग सल्लाह गरेर टुंगोमा पुग्छु भन्नुभयो । विश्वासको मतबारे सभापतिले एस अर नोमा जवाफ दिनु भएको छैन ।’ प्रचण्ड र देउवासँगको भेटवार्तामा खड्कासँगै नेता कृष्ण सिटौला पनि सहभागी थिए ।