देशैभरका सिडियोलाई गृहमन्त्रीको निर्देशन- 'मेरो मान्छे छोडिदेऊ भन्न आए नसुन्नुहोस्'

सरकार गठनपछि पहिलो पटक चितवन पुगेका उपप्रधान तथा गृहमन्त्री रवि लामिछानेले आज चितवनस्थित सबै सरकारी कार्यालयका प्रमुखहरूसँग भेटघाट गरेका छन्। 

उक्त क्रममा गृहमन्त्री लामिछानेले सुरक्षा निकायलाई आदेश होइन कानुनको पालना गर्न निर्देशन दिएका छन्। आज भरतपुर विमानस्थलको पार्किङस्थलमा पत्रकारहरूसँग कुरा गर्दै उनले चितवन मात्र नभई देशैभरका प्रमुख जिल्ला अधिकारीहररूलाई उच्च मनोबलका साथ काम गर्न निर्देशन दिएका दिए।   

उनले कुनै पनि राजनीतिक दलको दबाबमा नपरी काम गर्नसमेत निर्देशन दिएका थिए। 'अपराध अनुसन्धानमा राजनीतिक दलले बाधा पुर्‍याउने वा मेरो मान्छे छोडिदेऊजस्ता कुरा नसुन्नुहोस्, त्यसरी दबाब दिएको प्रमाण ल्याएमा त्यस्ता मानिसलाई कानुनी दायरामा ल्याउन निर्देशन दिएको छु', उनले भने।  

आफू सभापति रहेको राष्ट्रिय स्वतन्त्र पार्टीको हकमा झन बढी निर्मम भएर काम गर्न निर्देशन दिएको उनको भनाइ छ । नेपाल प्रहरीलाई बलियो बनाउन र प्रहरी संगठनभित्र देखिएका समस्या समाधान गर्दै विधिको शासन कायम गर्नका निमित्त काम आफूले गरिरहेको बताए। यसका लागि योजना बनाइरहेको उनले जानकारी दिए।  

उनले सरकारले छिट्टै पूर्णता पाउने भन्दै आफ्नो पार्टीले विज्ञताका आधारमा सरकारमा सहभागी हुने स्पष्ट पारे। सबै निकायसँग समन्वय गरेर मुलुकको विकासका काम गरिने उनको भनाइ छ । 

देशभर बन्द भएका अवैध क्रसर उद्योग सञ्चालनका विषयमा सचिवस्तरीय छलफल भइरहेको भन्दै उनले कानुनको पालना गर्ने विषयमा आफू कटिबद्ध रहेको स्पष्ट पारे।