त्रिभुवन अन्तर्राष्ट्रिय विमानस्थलको आन्तरिक टर्मिनलतर्फको व्यवस्थापन शाखा प्रमुख पूर्णप्रसाद चुडालको साथबाट स्रोत नखुलेको थप ८ लाख रुपैयाँ बरामद भएको छ । उनको साथबाट विभिन्न ब्रान्डका ९ बोतल मदिरा, ४ थान मोबाइल, १ लाख ५० हजार रुपैयाँ रङ्गेहात घुस र थप स्रोत नखुलेको ८ लाख रुपैयाँ बरामद भएको अख्तियार दुरुपयोग अनुसन्धान आयोगमा प्रवक्ता श्याम प्रसाद भण्डारीले जानकारी दिए । 

विमानस्थलमा पास बनाइदिने भन्दै महिनाको १० हजारको दरले १५ महिनाको कुल १ लाख ५० हजार रुपैयाँ घुस सहित शुरुमा रङ्गेहात पक्राउ परेका थिए ।  पछि थप अनुसन्धान गर्दा मदिरा, मोबाइल र स्रोत नखुलेको ८ लाख रकम बरामद भएको हो ।

उनले यात्रुहरूलाई यात्रा सहज बनाइदिने भनेर सेवाग्राहीबाट घुस मागेको उजुरीको आधारमा अख्तियारको टोली सोमबार ‘स्टिङ अपरेशन’ का लागि विमानस्थल पुगेको थियो । 

सो क्रममा अख्तियारको टोलीले उनलाई घूसबापतको रकमसहित कार्यकक्षबाटै नियन्त्रणमा लिएको हो । भण्डारीले चुडाललाई नियन्त्रणमा लिएसँगै थप अनुसन्धान थालिएको जानकारी दिए ।