चीनसँगको सीमा वास्तविक नियन्त्रण रेखा नजिक भारतले १३५ किलोमिटर राजमार्ग निर्माण गर्ने भएको छ । 

लद्दाखको चुशूलदेखि डेम्चोकसम्म दुई वर्षमा यो राजमार्ग बनाउने तयारी गरिएको छ । यस राजमार्गमार्फत चीनलाई टक्कर दिन भारत सक्षम हुने भारतीय सञ्चारमाध्यमहरूले खबर दिएका छन् । 

राजमार्ग रणनीतिक दृष्टिले महत्त्वपूर्ण छ । बोर्डर रोड्स अर्गनाइजेसनलाई यो राजमार्ग बनाउने काम दिइनेछ । 

बीआरओले सोमवार राजमार्ग बनाउने टेन्डर पनि जारी गरिसकेको छ । सिंगल लेन हाईवे बनाउन लगभग ४०० करोड भारु खर्च लाग्नेछ । 

यो राजमार्ग वास्तविक नियन्त्रण रेखासँगै सिन्धु नदीदेखि लेहमा सीमा नजिक पुग्नेछ । विगत कैयौं दशकदेखि यो सडक कच्ची थियो । 

चीनले भारत सीमानजिक बलियो पूर्वाधार बनाइसकेको अवस्थामा भारतलाई पनि पक्की संरचना बनाउन दबाब परिरहेको थियो ।