प्रदेश १ सरकार गठन भएको यतिका समयपछि बल्ल मन्त्रीहरू क्वार्टर सर्ने तरखरमा छन्।

प्रदेश १ सभामुख बाबुराम गौतम र उपसभामुख सिर्जना दनुवारलाई प्रदेश सरकारले सरकारी आवास उपलब्ध गराउने कानुनी व्यवस्था छ। तर उनीहरू अझै महँगो सरकारी खर्च बेहोरेर होटलमा बसिरहेका छन्।

यसअघिका सभामुख प्रदीप कुमार भण्डारी र उपसभामुख सरस्वती पोख्रेल घरमै बस्ने गरेका थिए ।

उनीहरूलाई घर भाडाबापत मासिक २० हजार संसद् सचिवालयले उपलब्ध गराउने गरेको थियो ।

सरकारले अझै बासको टुंगो नलगाएकाले सभामुख र उपसभामुख गाउँमै व्यस्त छन् ।

सरकारले आवासको व्यवस्थापन गर्न नसकेपछि संसद नै स्थगित भएको थियो।

प्रदेश १ संसद् सचिवालयले आवासका लागि सूचना प्रकाशन गरेको भए पनि सरकारले आवश सुविधाका कुनै निर्णय गरेको छैन।

जसका कारण सभामुख उपसभामुख फर्केपछि कहाँ राख्ने भन्ने चिन्ता हुन थालेको संसद् कार्यालयका एक कर्मचारीले बताए । बैठक चल्दा सभामुख भने होटलमा बस्ने गरेका थिए ।

कालो बोको काटेर सरे मुख्यमन्त्री

यस्तै मुख्यमन्त्री हिकमत बहादुर कार्की भने सरकारी निवास सरेका छन्।

उनी यसअघिका मुख्यमन्त्री राजेन्द्र राई बसेको क्वाटरमा सरेका हुन् । मुख्यमन्त्री कार्यालयका कर्मचारीका अनुसार उनी कालो बोको काटेर क्वार्टरमा सरेका हुन् ।

विराटनगरस्थित सुनसरी मोरङ सिँचाइ आयोजनाको भवनलाई सरकारी निवास बनाइएको छ ।

निवर्तमान मुख्यमन्त्री राजेन्द्र राईले मुख्यमन्त्रीका लागि सरकारी निवासका रुपमा सिँचाइ आयोजनाको भवन प्रयोग गरेका थिए ।

शेरधन राईका लागि भने सरकारी निवासका रुपमा एउटा घर भाडामा लिइएको थियो ।

मुख्यमन्त्रीको निवासका लागि भाडामा लिइएको घरको भाडाबापत मासिक ६० हजार रुपैयाँ मुख्यमन्त्री तथा मन्त्रिपरिषदको कार्यालयले बुझाउँदै आएको थियो ।

सामाजिक विकास मन्त्री बुद्धिकुमार राजभण्डारी आफन्तको घरमा बसेका छन्। सडक पूर्वाधार मन्त्री दुर्गा चापागाईं भने क्वार्टरमा सरेका छन् । अघिल्लो मन्त्रीका लागि लिएको क्वार्टरमा उनी सरेका हुन् ।

वन, वातावरण तथा भू–संरक्षण मन्त्री जीवन आचार्य पनि क्वाटर सर्ने तयारीमा छन्।

प्रधानमन्त्रीसमेत रहका पुष्पकमल दाहाल 'प्रचण्ड'का ज्वाइँ आचार्यका लागि क्वार्टरको व्यवस्थापन गर्न आर्थिक मामिला मन्त्रालयसँग छलफल भइरहेको लेखा अधिकृत पेम्बा शेर्पाले बताए ।

आचार्यको घर विराटनगरमै छ । उनको घर र मन्त्रालय १ किलोमिटरको दूरीमा मात्र छ।

मुख्यमन्त्री कार्कीले आर्थिक मामिला तथा योजना मन्त्री भने नियुक्त गरेका छैनन् ।

कृषि मन्त्री भक्तिप्रसाद सिटौलाका लागि भने मन्त्रालयले निजी घरको व्यवस्था गरिसकेको छ।

मन्त्रीहरूका लागि आवास सुविधा भनेर २९ हजार दिने गरेको छ । अघिल्ला कार्यकालमा धेरै मन्त्रीहरू घरबाटै धाएका थिए ।