युरोपेली संघले रुसका पेट्रोलियम पदार्थमाथि लगाएको प्रतिबन्धका कारण अमेरिकाका पूर्वी भागमा रहेका राज्यहरूमा इन्धन अभाव हुन सक्ने ब्लूमबर्गले खबर दिएको छ । 

उक्त खबरमा उल्लेख भएअनुसार, अमेरिकाको पेट्रोलियम भण्डार विगत एक दशकमै सबभन्दा न्यून स्तरमा छ । अझ जाडो याममा तेल प्रशोधन केन्द्रहरूलाई निकै ध्यान दिएर मर्मतसम्भार गर्नुपर्ने भएकाले भण्डार थप रित्तिने सम्भावना छ । 

अमेरिकाले पेट्रोलियम पदार्थ निर्यात गर्ने गरेको भए पनि यसको अत्यधिक आपूर्ति खाडी तटतर्फ हुने गरेको छ । पूर्वी तटमा इन्धन पुर्‍याउन कठिन छ किनकि पाइपलाइन क्षमता अपर्याप्त छ र जहाजबाट गरिने ढुवानीको मूल्य चर्को पर्छ । त्यसैले त्यो क्षेत्र विशेषगरी गर्मी याममा युरोपबाट आउने आपूर्तिमा निर्भर छ । 

फेब्रुअरी ५ बाट रुसी इन्धन उत्पादनमा युरोपेली संघले नयाँ प्रतिबन्ध लगाएको छ । त्यसबाट युरोपले आफूलाई इन्धन लिएर अमेरिकालाई समेत उपलब्ध गराउन गाह्रो पर्ने ब्लूमबर्ग लेख्छ । 

यस्तो स्थितिमा तेलको मूल्य झनै बढ्नेछ । अमेरिकीहरू अहिले नै एक ग्यालनको ५ डलर तिर्नुपर्दा मर्कामा परिरहेका छन् । 

ब्लूमबर्गका अनुसार, अमेरिकी कम्पनीहरूले अभावबाट मुक्त हुनका लागि नयाँ स्रोत खोज्नुपर्ने भएको छ । मेक्सिको खाडीबाट क्यारिबियनतर्फ इन्धन पठाउने अनि त्यसलाई अमेरिका ल्याउने एउटा विकल्प हुन सक्छ ।

वैकल्पिक रूपमा अमेरिकाले एसिया र मध्यपूर्वबाट आपूर्ति बढाउनका लागि कोशिश गर्न सक्छ । तर यस्तो निर्णयका कारण बन्दोबस्तीमा आउने कठिनाइले उल्लेख्य परिवर्तन गर्न दिँदैन ।