भारतको तामिलनाडुमा भएको एक भागदौडमा चार महिलाको मृत्यु भएको छ। 

तमिलनाडुको तिरुपत्तुरको वानियाम्बडीमा शनिबार थाइपुसम पर्वको अवसरमा यहाँ एक व्यक्तिले निःशुल्क साडीको टोकन वितरण गरिरहँदा भागदौड मच्चिएको र उक्त क्रममा महिलाहरूको ज्यान गएको प्रहरीले बताएको छ। 

टोकन लिन ठूलो संख्यामा मानिसहरू जम्मा भएका थिए । यसै क्रममा भागदौड भएको थियो । दुर्घटनामा केही महिला घाइते पनि भएका भारतीय सञ्चारमाध्यमहरूले जनाएका छन्। 

तमिल समुदायले थाइपुसम पर्व मनाउँछन्। यो भगवान मुरुगनको जन्मजयन्ती हो। भगवान मुरुगन कार्तिकेय हुन्। यस दिन देवी पार्वतीले भगवान मुरुगनलाई तारकासुर नामक राक्षस र उनको सेनालाई मार्ने आदेश दिएकी थिइन् भन्ने मान्यता छ । त्यसपछि भगवान कार्तिकेयले तारकासुरको वध गरेका थिए । त्यही अवसरमा यो पर्व मनाइन्छ।