नेपाली सेनाले २६० औं सेना दिवसको रुपमा औचारिक गणना गर्ने भएको छ ।

पृथ्वी नारायण शाहले स्थापना गरेको ५ वटा कम्पनीको बर्षलाई हिसाब गरेर २६० र्औ सेना दिवसबाट गणना गर्न लागेको सैनिक प्रवक्ता कृष्णप्रसाद भण्डारीले जनाकारी दिए । 

‘हामीले यो वर्षबाट यतिऔं सेना दिवस भनेर गणनाको शुरुवात गर्न लागेका छौं,’ प्रवक्ता भण्डारीले भने ।

यसभन्दा अगाडि सेनाले सैनिक दिवस मनाउँदै आएको थियो तर यति औं भनेर नमनाएको उनले बताए । 

सेनाले पृथ्वीनारायण शाहले विसं १८९० मा औपचारिक रुपमा स्थापना गरेको ५ वटा कम्पनीहरूको समयबाट अहिलेसम्मलाई २६० औं वर्षका रूपमा मनाउन लागेको छ ।

१८९० को असोज महिना श्रीनाथ कम्पनीको स्थापना गरेका थिए । त्यसपछि कालिक्स कम्पनी, बर्दवाणी कम्पनी, सबुज कम्पनी र गोरख कम्पनी खडा गरेको इतिहास रहेको प्रवक्ता भण्डारीले बताए । यसपछि नेपाली सेनाको इतिहासमा आधुनिक युगको शुरूआत भएको मानिन्छ ।

अहिले ती कम्पनीहरू गण  (बटालियन) का रुपमा रहेका छन् ।

त्यसमध्ये गोरख गणलाई नाम परिवर्तन गरेर पुरानो गोरख बनाइएको छ । बर्दवाणी कम्पनीलाई जंगबहादुर राणाले तिब्बतको लडाइँमा नेपालले जितेका कारण बर्दबहादुर गणको रूपमा नामकरण गरेर अहिलेसम्म सोही नाम रहेको सेनाले जनाएको छ ।

कालिबक्स गण इन्जिनियरिङ गणको रूपमा रहँदै आएको प्रवक्ता भण्डारीले लोकान्तरलाई बताए ।

वीर स्मारकमा अखण्ड दीप प्रज्वलन

सेनाले उपत्यकाका २ ठाउँ, टुँडिखेल र छाउनीमा रहेका सैनिक संग्रहालय र राष्ट्रिय संग्रहालयमा रहेको वीर स्मारकमा फागुन ६ गते सैनिक दिवसदेखि निरन्तर बल्ने गरी दीप प्रज्वलन गर्न लागेको छ ।

सैनिक प्रवक्ता ब्रिगेडियर जर्नेल कृष्णप्रसाद भण्डारीका अनुसार ५ गते छाउनीमा विषेश कार्यक्रम गरेर दीप प्रज्वलन गर्ने र ६ गते सेना दिवसको उपलक्ष्यमा टुँडिखेलमा दीप प्रज्वलन गरेर कहिल्यै ननिभ्ने गरी राखिनेछ । 

सेनाले यो वर्षको दिवसमा नेपाली मौलिक संस्कृतिमा रहेको मादलको विषेश प्रस्तुति दिने तयारी गरेको छ ।

सैनिक प्रवक्ताका अनुसार सेनाले ५  सय ५५ वटा मादलको विशेष प्रस्तुति गर्नेछ।