कतै खसी करायो भने यसो लागिहाल्छ - गगन थापा

नेपाली कांग्रेसका महामन्त्री गगन थापाले सार्वजनिक पदमा रहने व्यक्तिले अरूको गाली पचाउन सक्नुपर्ने बताएका छन् ।

आफूविरुद्ध गाली गरेर लेख्नेविरुद्ध जाइलागे गृहयुद्ध नै हुने उनले टिप्पणी गरे ।

लोकतन्त्र संवाद केन्द्रले बुधबार काठमाडौंमा आयोजना गरेको कार्यक्रमलाई सम्बोधन गर्दै महामन्त्री थापाले आफूमाथि कयौँ गाली आउँदा पनि आफूले प्रतिकार नगरेको बताएका हुन् ।

‘स्वतन्त्र पार्टीको पत्रकार सम्मेलनमा रविले बोलेको भाषा सुनियो । सामाजिक सञ्जालमा मलाइ त दलाल, भ्रष्टाचारी भनेर लेखिरहेका हुन्छन्, मेरोविरुद्ध बोल्नेलाइ खोज्दै हिड्यो भने त गृह युद्ध हुनेभयो,’ उनले भने। 

महामन्त्री थापाले आफूमाथि सामाजिक सञ्जालमा गालीको वर्षा आए पनि सूचना प्रविधि विधेयकविरुद्ध आफूले बोलेको बताए ।

लोकतन्त्रमा अभिव्यक्ति स्वतन्त्रतालाई रोक्न नमिल्ने उनले टिप्पणी गरे । ‘म आफैँ कति भारी बोकेर हिँडिरहेको छु, कतै खसी करायो भने यसो लागि हाल्छ, साच्चिकै लाग्छ । मैले यसलाई अभिव्यक्तिको स्वतन्त्रता कुण्ठित गर्नेगरी सोचेँ भने घातक हुन्छ’, थापाले भने ।

थापामाथि बाख्रा पालमा सरकारी अनुदान लिएको आरोप लाग्ने गरेको छ । आइतबारको पत्रकार सम्मेलनमा रास्वपाका सभापति रवि लामिछानेले गगनमाथि बाख्रा बेचेको र आफूलाई चारवटा श्रीमतीको आरोप समाजले जबरजस्ती थोपरिदिएको बताएका थिए ।