नेकपा एमालेका तत्कालीन स्थायी कमिटी सदस्य घनश्याम भुसालले पार्टी परित्याग गरेपछि रिक्त रहेको अर्थ तथा योजना विभाग प्रमुखको जिम्मेवारी स्थायी कमिटी सदस्य डा. विन्दा पाण्डेलाई दिइएको छ ।

बिहीवार अध्यक्ष केपी शर्मा ओलीको अध्यक्षतामा पार्टी कार्यालय च्यासलमा बसेको सचिवालयको पन्ध्रौ बैठकले रिक्त पदमा कार्यविभाजन गरेको हो ।

बैठकले १ नम्बर प्रदेश इन्चार्जमा स्थायी कमिटी सदस्य राजेन्द्र गौतम, अपाङ्गता फाँटको इन्चार्जमा पोलिटब्यूरो सदस्य पार्वत गुरुङ र धनुषा जिल्ला इन्चार्जमा केन्द्रीय सदस्य शीला यादवलाई जिम्मेवारी तोकेको छ ।

बैठकले वर्तमान सरकार गठनले जनतामा व्यापक उत्साह सिर्जना भएको निष्कर्ष निकाल्दै सत्ता साझेदारीलाई अझ बलियो बनाएर अगाडि बढ्ने निर्णय गरेको केन्द्रीय प्रचार तथा प्रकाशन विभाग सचिव गगन विष्टद्वारा जारी प्रेस विज्ञप्तिमा उल्लेख छ ।

पार्टीको वैचारिक तथा सांगठनिक सदृढीकरणका लागि आगामी फागुन १ गतेदेखि २ महिने ‘मिसन ग्रासरुट’ अभियान सञ्चालन गर्ने निर्णय पनि बैठकले गरेको छ । एमाले केन्द्रीय कमिटीका सदस्यहरूले २ महिना स्थानीय तहमा रहेर पार्टीले निर्धारण गरेका ११ वटा कार्ययोजनाअनुसार कार्यसम्पादन गर्नुपर्ने विज्ञप्तिमा उल्लेख छ ।

एमालेले फागुन ५ गते सातै प्रदेशमा अभिमुखीकरण कार्यक्रम आयोजना गर्ने जनाएको छ ।