नेकपा एकीकृत समाजवादीका नेता घनश्याम भूसालले विवेकशील साझा पार्टीले उठाएका पपुलर नारालाई स्टण्टबाजले हाइज्याक गरेको टिप्पणी गरेका छन् ।

चुनाव नजिते पनि विवेकशीलले उठाएका विषय अहिले पनि सान्दर्भिक रहेको उनले बताए ।

विवेकशील साझाको पार्टी प्रथम अधिवेशनलाई शुक्रबार काठमाडौंमा सम्बोधन गर्दै भूसालले स्टण्टबाजहरूले अरूको राजनीतिक एजेण्डा हाइज्याक गर्ने संसारभरको प्रवृत्ति रहेको बताएका हुन्।

‘तपाईहरूका नारा ठीक छन्, यी नारालाई पपुलर स्टन्टबाजले हाइज्याक गर्छन्, इतिहास संसारभरको यस्तै छ’, भुसालले भने, ‘साझाको निश्चलता र प्रतिबद्धतासँग ऐक्यबद्धता जनाउने ठूलो पंक्ति छ ।’

भूसालले २० वर्षमा देशलाई आर्थिक समृद्धिमा लैजान सकिने त्यसका लागि सही पात्र आवश्यक रहेको बताए ।

‘रोजगारी निर्माण गर्ने पुँजी र देश बनाउने पार्टी आजको आवश्यकता हो। २० वर्षमा देश बनाउन देश बनाउने पात्र चाहिन्छ । पात्र भनेको पार्टी हो’, भूसालले भने, ‘त्यस्तो पार्टी होस् जसले अर्थतन्त्र र समाजलाई सँगैसँगै लिएर जान्छ ।’