सुदूरपश्चिम प्रदेशका नवनियुक्त मुख्यमन्त्री कमलबहादर शाहले जेलमा रहेका रेशम चौधरीसहितका बन्दीहरूलाई रिहा गर्न आफूले सम्पूर्ण पहल गर्ने बताएका छन् ।

मुख्यमन्त्री नियुक्त भएपछि चौधरीकी आमा सुल्फीदेवी चौधरीलाई भेटेपछि मुख्यमन्त्री शाहले टीकापुर घटना राजनीतिक भएको भन्दै उनलाई छुटाउन आफू सम्पूर्ण रूपले लाग्ने बताएका हुन् ।

'टीकापुर घटनालाई राजनीतिक रूपमा हेरिनुपर्छ, लिइनुपर्छ । यसको समाधान पनि त्यही हिसाबले हुनुपर्छ । छिटोटभन्दा रेशम चौधरीको रिहाइका लागि मेरो तर्फबाट हुने सम्पूर्ण पहल गर्छु । यो अभियानमा लागिसकें पहल गर्छु’, शाहले भने, ‘हिजो पदीय दायित्व र जिम्मेवारी नहुँदा पनि यो अभियानमा  लागेको थिएँ । आज पदमा हुँदा जिम्मेवारी बढेको छ । टीकापुर घटनाको राजनीतिक निकासका लागि रेशम चौधरीसहित बन्दीको रिहाइको अभियानमा सशक्त रुपमा अगाडि बढ्ने छु । जहाँसम्म मलाई विश्वास छ राज्य र केन्द्रीय सरकारले बुझ्नेछ र रिहाइ गर्नेछ ।’

टीकापुर घटना दुखद् रहेको भन्दै उनले सामाजिक सद्भाव नभड्किओस् भनेर आफूहरू सचेत भएको पनि बताए । 

‘टीकापुरमा दुखद घटना भएको छ । यो पीडादायक छ । हामी समाजमा परिवारका रुपमा बसेका थियौं । दाजुभाइ  परिवारका रुपमा दाइभाइ गरेर बसेका थियौँ । यो वातावरणमा यो घटनाले ठेस पुग्यो कि भन्ने लाग्छ । त्यस्तो वातावरण नहोस् भनेर लाग्नुपर्छ’, उनले भने, ‘टीकापुरलाई बद्नाम गर्ने काम धेरै ठाउँबाट भए । यसबाट सचेत भएर जनता, मतदाता, बुद्धिजीवी, पत्रकार एक ठाउँमा छौं भन्ने सन्देश दिनुपर्छ । यो काम मैंले शुरू गर्नुपर्छ । हामी सबै एक ठाउँमा उभिनुपर्छ । हामी जसरी हिजो एक ठाउँमा थियौं । भोलि पनि एक ठाउँमा उभिन्छौं ।’

एमालेका मुख्यमन्त्री राजेन्द्रसिंह रावलले विश्वासको मत नपाएपछि पदमुक्त भएका थिए । रेशम चौधरीको नागरिक उन्मुक्ति पार्टीले सरकार गठन हुँदा समर्थन दिएको थियो । तर विश्वासको मत लिँदा यो पार्टीका सांसदले मत नदिएपछि एक महिनामा सरकार गिरेको छ । संविधानअनुसार त्यसपछि संसदको सबैभन्दा ठूलो दलको रुपमा कांग्रेसका शाह मुख्यमन्त्री भएका हुन् ।

शाहले पनि एक महिनामा विश्वासको मत लिनुपर्नेछ । १९ सिट भएको कांग्रेसलाई बहुमत पुर्‍याउन नेकपा एसको ४ सिटले २३ मात्रै पुग्छ । तर आवश्यक २७ मत कटाउन नागरिक उन्मुक्ति पार्टीको समर्थन आवश्यक पर्छ । उन्मुक्तिले डिल्लीबजार कारागारमा रहेका चौधरीको रिहाइलाई मुख्य माग बनाएको छ । तर टीकापुर घटनामा दोषी ठहर भएका उनलाई छुटाउन सजिलो भने छैन ।

तर पनि उन्मुक्तिलाई मनाउन नयाँ मुख्यमन्त्रीले अहिलेदेखि नै पहल थालेका हुन् ।

संसदीय दलको नेता चयन भएलगत्तै पनि शाहले कारागारमा पुगेर चौधरीलाई भेटेका थिए ।