नेकपा (एमाले) का अध्यक्ष केपी शर्मा ओलीले अहिलेको सत्ता गठबन्धनमा बहुमत भए पनि कसैको बहुमत नभएकोले जोखिम भइरहेको बताएका छन् । 

अनेरास्ववियुको २३ औँ राष्ट्रिय महाधिवेशन उद्घाटन गर्दै ओलीले पुरानो गठबन्धन भत्काएर नयाँ गठबन्धन बनाए पनि संसद्को बनावट अस्थिर रहेको प्रस्ट पारेका छन्। 

‘अहिले साथीहरू काफी प्रशन्न भएको देख्छु म । हामीले ५ दलीय गठबन्धन तोडेर अर्को एउटा सरकार बनाएका छौँ । यो सफलताको कुरा हो । तर हाम्रा आम रुपमा पार्टीका साथीहरू प्रशन्न भएको देखिन्छ । प्रशन्न हुनुपर्दछ,’

ओलीले अहिलेको  गठबन्धन लामो समय जानेमा शंका गर्दै भने, ‘तर कथम कदाचित यो स्थिति फेरियो भने ? संसदको बनावट नै अस्थिरताको कारक हुनेखालको बनावट छ । बहुमत कसैको छैन । हाम्रो पार्टीसँग बहुमत छैन । हामीसँग बहुमतभन्दा निकै तल सिट छ । र अनेक प्रकारका, भित्रका, बाहिरका अनेक शक्तिहरू यो देश बर्बाद पार्न क्रियाशील छन् ।’

स्थिरता हुन नदिने प्रयासस्वरुप अनेक खालका प्रयास भइरहेकोसमेत ओलीले बताएका छन् । 

‘यो देश बर्बाद पार्न सबभन्दा पहिले यदी कुनै डाकाले बैंकमा डकैती गर्नपर्‍यो भने पहिले पालेलाई प्रहार गर्छ । नेकपा (एमाले) यो देशमा डकैती गर्न नदिने गेटको पाले हो । यसमाथि नहानीकन भित्रै पस्न पाउँदैन । त्यसकारण पहिले यसमाथि प्रहार हुनसक्छ, भइआएको छ,' ओलीले भनेका छन्, ‘त्यसकारण फेरि पनि हुँदैन भन्न सकिँदैन । अनेक प्रकारका शक्तिहरू क्रियाशील छन् । अनेक प्रकारका षड्यन्त्रहरू भइरहेका छन् । यहाँ स्थिरता, स्थायित्व हुन नदिने खालका प्रयासहरू भइरहेका छन् ।’

ओलीले सत्ता स्वार्थका लागि राष्ट्रियता, अखण्डता र स्वतन्त्रका विषयलाई नलत्याउने पनि बताएका छन् । 

‘हामी यो देशका सन्तति हौं, हामीले नै मातृभूमिको रक्षा गर्ने हो । मातृभूमिको स्वाधीनता बचाएर राख्ने हो र त्यस्तो भूमिका निभाउने राष्ट्रिय गौरव र स्वाभिमानको संक्षिप्त नाम नै एमाले हो, एमालेमात्रै त्यसको प्रतिनिधि हो,’ ओलीले भने, ‘हामी सत्ता स्वार्थका लागि राष्ट्रियता, राष्ट्रिय अखण्डता र राष्ट्रिय स्वतन्त्रताजस्ता महत्वपूर्ण विषयहरूलाई लत्याएर कुनै स्वार्थमा लाग्दैनौं ।’

अध्यक्ष ओलीले विगतमा नेपालको शिक्षालाई बुर्जुवा शिक्षा भनेर प्रचार गरिनु गलत भएको पनि बताए । 

‘पहिले पहिले हाम्रो समयतिर खुब चल्यो, बुर्जुवा शिक्षा बहिष्कार गरौँ भन्ने कसैले । कसैले क्या मौका मिल्यो, पढ्न गाह्रो भइराखेको थियो बुर्जुवा शिक्षा बहिष्कार गरौँको नारा च्याप्प समात्यो, कुद्यो’ उनले भने, ‘वास्तवमा त्यो बुर्जुवा शिक्षा बहिष्कार गरौँको नारा बिल्कुल नचाहिने काम थियो । र त्यो संस्थागत रुपमा कसैले दिएको पनि होइन । केही मान्छेका लहडमा बुर्जुवा शिक्षा, मानिलिऊँ सर्वहारा शिक्षाको युनिभर्सिटी कतै उनले खोलेर राखेको जस्तो । त्यहाँ गएर पढ्दा हुनेजस्तो ।’

उनले नेपाल विद्यार्थी संघले अनेरास्ववियुसँग प्रतिस्पर्धा गर्न नसक्ने र अन्य विद्यार्थी संगठनहरू भर्खरै सिक्दै गरेका भनी टिप्पणी पनि गरे ।

‘नेविसंघ भनेको अनेरास्ववियुसँग जित्न नसकेर २७ सालमा, २६ सालमा निऊँ खोजेर अलग भएर २७ सालदेखि अलग्गै संगठनको रूपमा काम गरेको । २६ सालमा अनेरास्ववियु फुटाएर नेविसंघ बनाएको । अनेरास्ववियुभित्र लड्न नसकेर, अडिन नसकेर, टिक्न नसकेर भागेको संगठन हो ,’ उनले भने, ‘अब अरू पछि जन्मिएका भाइ, बहिनी संगठनहरू यसो खेल्दैछन् । सिक्दैछन् । ती तपाईंहरूको संगठनका भाइबैनी संगठन हुन् । ती त पछिपछि हामीसँग सिक्दै त्यसरी खोल्दै गएका हुन् । त्यसकारण अहिले उनीहरूको जित्ने बेला भएको छैन । अहिले उनीहरू सिक्ने हो ।’

नेविसंघलाई सधैं छक्का हानेको भन्दै यसपटकको स्ववियु चुनावमा पनि राम्रो ब्याटिङ गर्न उनले आग्रह गरे ।

‘नेविसंघलाई हामीले जहिल्यै पनि छक्का हान्दिने गरेको हो । त्यसकारण मैले विश्वास लिएको छु, यसपल्ट पनि तपाईंहरूको ब्याटिङ डरलाग्दो हुनेछ । तपाईंहरूले स्ववियु निर्वाचनमा अरूको बलिङलाई छक्का हानेर दर्शकदीर्घामा पुर्‍याइदिनुहुनेछ । हरेक क्याम्पसमा अनेरास्ववियु । यसरी तपाईंहरू जानुहुन्छ भन्ने मैले विश्वास लिएको छु,’ ओलीले भने ।