नेकपा एमालेनिकट विद्यार्थी संगठन अनेरास्ववियुको नयाँ नेतृत्व चयनको लागि निर्वाचन शुरु भएको छ ।

नेतृत्वका लागि सहमति जुटाउने प्रयास विफल भएपछि चुनावबाट नेतृत्व चयन हुन लागेको हो ।

केही पदमा सहमति जुटे पनि अध्यक्षसहित पदमा पनि निर्वाचन शुरु भएको हो । 

अध्यक्षका लागि वरिष्ठ उपाध्यक्ष आरसी लामिछाने र महासचिव समिक बडालबीच मुख्य प्रतिस्पर्धा हुने देखिएको छ ।

त्यस्तै अध्यक्षका लागि अन्य २ उम्मेदवार पनि प्रतिस्पर्धामा छन् । उपाध्यक्षहरू मोती विक र लोकेश निरौला पनि अध्यक्षको प्रतिस्पर्धामा छन् । अध्यक्षमा उम्मेदवारी दिए पनि वाङछु योञ्जनले बडाललाई समर्थन गरेर उम्मेदवारी फिर्ता लिएका छन् ।

कमलादीस्थित प्रज्ञा प्रतिष्ठानमा विद्युतीय भोटिङ मेसिनबाट मतदान भइरहेको छ । 

अनेरास्ववियुमा १७ पदाधिकारीसहित १९९ केन्द्रीय सदस्य निर्वाचित हुँदैछन् । 

१७ पदाधिकारीमा अध्यक्ष, चार उपाध्यक्ष, एक महासचिव, १० सचिव र एक कोषाध्यक्ष छन् । 

४ उपाध्यक्षका लागि १६ जना, एक जना महासचिवको लागि ५ जना र १० सचिवका लागि ६१ जना, १ कोषाध्यक्षका लागि ४ जना प्रतिस्पर्धामा छन् ।

हरेक २ वर्षमा हुनुपर्ने अखिलको महाधिवेशन ७ वर्षमा हुँदै छ। यो २३ औं महाधिवेशन फागुन २ देखि शुरू भएको हो।