एमालेको मिसन ग्रासरुट अभियान सुरु हुँदै छ। 

अध्यक्ष केपी ओलीले भर्चुअल माध्यमबाट केहीबेरमा अभियान शुरूआत गर्दै छन्।

सबै प्रदेशर र विशेष प्रदेशमा हुने अभियानको अभिमुखीकरण कार्यक्रमको शुरूआत ओलीले गर्नेछन्। 

७ वटै प्रदेशमा आजबाट शुरू हुने अभियानबाट पार्टीमा नयाँ, गति र ऊर्जा प्राप्त हुने एमालेले जनाएको छ ।

एमालेले विभिन्न ११ वटा कार्यादेश दिएर पदाधिकारीसहितका केन्द्रीय नेतालाई यो अभियानमा खटाएको हो । यो अभियानले जनप्रतिनिधि र एमालेबीच सम्बन्ध सुधार, प्रशिक्षण, सदस्यता नवीकरण, विभिन्न राजसुझा संकलन गर्ने र पार्टीमा नयाँ गति कायम गराउने उद्देश्य एमालेले राखेको छ ।

एमालेले पदाधिकारीलाई भने कार्यक्रमको संयोजन र अनुगमनको जिम्मा दिएको छ । एमाले उपमहासचिव प्रदीप ज्ञवालीका अनुसार यो अभियान २ महिना चल्नेछ ।

शीर्ष नेता को कहाँ खटिए ?

अभिमुखीकरणका लागि प्रदेश–१ मा उपाध्यक्ष अष्टलक्ष्मी शाक्य, मधेश प्रदेशमा वरिष्ठ उपाध्यक्ष ईश्वर पोखरेल, बागमती प्रदेशमा उपाध्यक्ष सुरेन्द्र पाण्डे, गण्डकी प्रदेशमा उपाध्यक्ष युवराज ज्ञवाली, लुम्बिनी प्रदेशमा उपाध्यक्ष रामबहादुर थापा, कर्णाली प्रदेशमा उपाध्यक्ष सुवासचन्द्र नेम्वाङ र  सुदूरपश्चिम प्रदेशमा उपाध्यक्ष विष्णुप्रसाद पौडेल संयोजक तोकिएका छन् ।

महासचिव शंकर पोखरेलको नेतृत्वमा अनुगमन र संयोजन हुने उपत्यकामा रहेका गैरभौगोलिक विशेष कमिटी (केन्द्रीय कार्यालय) को अभिमुखीकरणमा उपमहासचिव प्रदीप ज्ञवालीले प्रशिक्षण दिने कार्यालय सचिव डा.भीष्म अधिकारीले जानकारी दिए ।

पार्टीलाई वैचारिक र संगठनात्मकरूपमा सुदृढ गर्ने र मुलुकमा राजनीतिक स्थायित्वको प्रत्याभूति गर्न यस्तो अभियान चलाउनुपरेको एमालेले जनाएको छ ।

गत ४ गत वैशाखमा भएको  स्थानीय तहको निर्वाचन र मंसिरमा भएको प्रतिनिधि सभा र प्रदेश सभाको निर्वाचनमा पार्टीविरूद्ध चौतर्फी घेराबन्दी, षडयन्त्र र आक्रमण हुँदा पनि त्यसलाई चिर्दै जनताको रोजाइको पहिलो पार्टी बनेको दाबी एमालेको छ ।

पार्टी सफलभए पनि पार्टीको संगठनात्मक जीवनमा देखापरेका अस्तव्यस्तता र अराजकताका कारण कमिटीगत परिचालनमा समस्या देखिएको पनि एमालेले जनाएको छ ।

निर्वाचनका सिलसिलामा विभिन्न गलत प्रवृत्ति प्रकट भएका कारण पार्टीले कैयौं महत्वपूर्ण स्थानहरू गुमाउनुपरेको हुँदा यस्ता समस्या समाधान गर्न पनि अभियान आवश्यक रहेको एमालेले जनाएको छ ।

यस्तो छ शीर्ष नेता र खटिएका स्थान

प्रदेश–१ः ​अष्टलक्ष्मी शाक्य, टोपबहादुर रायमाझी, शेरधन राई, अग्निप्रसाद खरेल, राजेन्द्रप्रसाद गौतम र हिक्मत कार्की

मधेश प्रदेशः ईश्वर पोखरेल, रघुवीर महासेठ, गुरुप्रसाद बराल, लालबाबु पण्डित र सीता पौडेल

​बाग्मती प्रदेशः सुरेन्द्र पाण्डे, गोकर्णराज विष्ट, काशीनाथ अधिकारी, रघुजी पन्त, कृष्णगोपाल श्रेष्ठ र शेरबहादुर तामाङ

गण्डकी प्रदेशः युवराज ज्ञवाली, पदमा कुमारी अर्याल, किरण गुरूङ, खगराज अधिकारी र थममाया थापा

लुम्बिनी प्रदेशः ​रामबहादुर थापा, छविलाल विश्वकर्मा, भीम आचार्य,  भानुभक्त ढकाल र राजन भट्टराई  

कर्णाली प्रदेशः सुवासचन्द्र नेम्वाङ, योगेशकुमार भट्टराई,  यामलाल कँडेल, गोरखबहादुर बोगटी र शिवमाया तुम्वाहाम्फे

सुदूरपश्चिम प्रदेशः विष्णुप्रसाद पौडेल, लेखराज भट्ट, मणिचन्द्र थापा, विन्दा पाण्डे र कर्णबहादुर थापा